Cyhoeddi Enillwyr Gwobr Ymchwil Iechyd Meddwl Pobl Ifanc CBSeic Cymru 2025/26

---

Mae Coleg Brenhinol y Seiciatryddion Cymru yn falch o gyhoeddi enillwyr Gwobr Ymchwil Iechyd Meddwl Pobl Ifanc 2025/26, sy'n dathlu ymchwil ragorol gan fyfyrwyr o bob cwr o Gymru.

Derbyniodd cystadleuaeth eleni nifer record o fynegiadau o ddiddordeb a chyflwyniadau, gan ddangos diddordeb cryf gan bobl ifanc mewn iechyd meddwl a lles.

Dyfarnwyd y lle cyntaf i Gwenan Dickenson (yn y llun), myfyriwr blwyddyn 12 yn Ysgol Gymraeg Gwynllyw, am ei phrosiect ardderchog, “Cerddoriaeth a’i heffaith ar gynhyrchiant a gallu disgyblion i ganolbwyntio” (PDF), a gynhaliwyd ac a ysgrifennwyd yn y Gymraeg.

Dyfarnwyd yr ail safle i Isobel Fisher ac Eloise Pitkin-Thomas, y ddwy yn fyfyrwyr blwyddyn 12 yn Ysgol Stanwell, am eu hymchwil pwysig ar “Straen Chweched Dosbarth: y berthynas rhwng ffactorau mewnol a straen academaidd i fyfyrwyr chweched dosbarth” (PDF).

Aeth y trydydd safle i Menna Hippsley-Jones, myfyriwr blwyddyn 12 yn Ysgol Gyfun Rhydywaun, am ei hastudiaeth ystyriol, “Ffit ond bregus – pan fydd ymarfer corff yn dechrau niweidio iechyd meddwl” (PDF).

Cafodd y ceisiadau eu gwerthuso am eu gwreiddioldeb ac ansawdd eu cyflwyniad, gyda'r beirniaid Dr Sara Forman a Dr Sunil Syal yn canmol safon uchel y prosiectau a'r ymgysylltiad meddylgar a ddangoswyd gan bawb.

Dywedodd yr Athro Alka Ahuja MBE, Cadeirydd Coleg Brenhinol y Seiciatryddion Cymru:

“Rydym wrth ein bodd yn dathlu cyflawniadau cyfranogwyr eleni. Mae’r nifer record o geisiadau yn adlewyrchu angerdd ac ymrwymiad pobl ifanc ledled Cymru i ddeall iechyd meddwl. Mae ansawdd y gwaith a gyflwynwyd wedi bod yn drawiadol, ac mae’r prosiectau hyn yn tynnu sylw at bwysigrwydd gwrando ar leisiau ifanc a chefnogi eu diddordeb mewn ymchwil.”

Mae'r wobr ar agor i fyfyrwyr ym mlynyddoedd 10-13 ac mae'n cynnig cyfle i ddatblygu sgiliau ymchwil wrth gyfrannu at sgyrsiau ehangach am iechyd meddwl.

Hoffai CBSeic Cymru estyn diolch diffuant i bob myfyriwr a gymerodd ran, ac i'r beirniaid am eu hamser, eu harbenigedd a'u hadborth gwerthfawr.

Gwybodaeth bellach am y wobr:

Coleg Brenhinol y Seiciatryddion Cymru | Gwobr Ymchwil Genedlaethol Iechyd Meddwl Pobl Ifanc