பசியின்மை மற்றும் புலிமியா

Below is a Tamil translation of our information resource on anorexia and bulimia. You can also view our other Tamil translations.

பின்வரும் சந்தர்ப்பங்களில் இந்தத் தகவல் உங்களுக்கு உதவியாக இருக்கும் என்று நம்புகிறோம்:

• நீங்கள் தொடர்ந்து உங்கள் எடை மற்றும் உடல் தோற்றத்தைப் பற்றிச் சிந்திக்கிறீர்கள்
• உங்கள் உணவு அல்லது உணவுக் கட்டுப்பாடு ஒரு பிரச்சனையாக இருக்கலாம் என்று நீங்கள் உணர்கிறீர்கள்
• எடையைக் குறைக்க, அதிக உடற்பயிற்சி செய்வது அல்லது உங்களை நோய்வாய்ப்படுத்துவது போன்ற பிற வழிகளை நீங்கள் தீவிரமாகப் பயன்படுத்துகிறீர்கள்
• உங்களுக்குப் பசியின்மை அல்லது புலிமியா இருக்கலாம் என்று நினைக்கிறீர்கள்
• மற்றவர்கள் நீங்கள் அதிகமாக எடை இழந்துவிட்டீர்கள் என்று கவலைப்படுகிறார்கள்
• உங்களுக்கு இந்த மாதிரியான பிரச்சனை உள்ள ஒரு நண்பர் அல்லது உறவினர், மகன் அல்லது மகள் இருந்தால்.

இது அதிக எடையுடன் இருப்பதன் பிரச்சனைகளைக் கையாள்வதில்லை.

அறிமுகம்

நம் அனைவருக்கும் வெவ்வேறு உணவுப் பழக்கங்கள் உள்ளன. நம்மை ஆரோக்கியமாக வைத்திருக்க அனுமதிக்கும் ஏராளமான "உணவு முறைகள்" உள்ளன. இருப்பினும், சில உணவு முறைகள் உடல் பருமனாகிவிடுமோ என்ற தீவிர பயத்தால் உந்தப்பட்டு, உண்மையில் நமது ஆரோக்கியத்திற்குத் தீங்கு விளைவிக்கும். இவை "உணவுக் குறைபாடுகள்" என்று அழைக்கப்படுகின்றன, மேலும் அவை பின்வருவனவற்றை உள்ளடக்குகின்றன:

• மிக அதிகமாகச் சாப்பிடுதல்
• மிகக் குறைவாகச் சாப்பிடுதல்
• கலோரிகளை அகற்றத் தீங்கு விளைவிக்கும் வழிகளைப் பயன்படுத்துதல்.

உண்மையில், 'உணவுக் குறைபாடுகள்' என்பவற்றில் வெறும் உணவு பழக்கம்மட்டும் இல்லை, இதனால் அவற்றால் பாதிக்கப்பட்டவர்கள் கலோரிகளை உட்கொள்வதை எவ்வாறு தவிர்ப்பது அல்லது எப்படி 'எரிப்பது' அல்லது அவற்றை எவ்வாறு அகற்றுவது என்பது பற்றித் தொடர்ந்து கவலைப்படுகிறார்கள். அவர்கள் தங்கள் எடை மற்றும் தோற்றத்தை எப்போதும் சரிபார்த்துக் கொள்கிறார்கள், தங்கள் எடை அதிகரிக்கவில்லை என்பதை உறுதிப்படுத்திக்கொள்ள, கண்ணாடியில் தங்களைப் பார்ப்பதையோ புகைப்படங்களில் இருப்பதையோ தவிர்க்கிறார்கள்.

இந்தத் துண்டுப்பிரசுரம் இரண்டு உணவுக் குறைபாடுகளைப் பற்றி விவாதிக்கிறது - அனோரெக்சியா நெர்வோசா மற்றும் புலிமியா நெர்வோசா. இது இரண்டு குறைபாடுகளையும் தனித்தனியாக விவரிக்கிறது. எனினும்

• பசியின்மை மற்றும் புலிமியாவின் அறிகுறிகள் பெரும்பாலும் கலக்கப்படுகின்றன
• மக்கள் புலிமியாவிலிருந்து பசியின்மைக்கு மாறலாம், அல்லது நீங்கள் பசியின்மை அறிகுறிகளுடன் தொடங்கலாம், ஆனால் பின்னர் புலிமியாவின் அறிகுறிகளை உருவாக்கலாம்.

யாருக்கு உணவுக் குறைபாடுகள் ஏற்படுகின்றன?

சிறுவர்கள் மற்றும் ஆண்களை விடச் சிறுமிகள் மற்றும் பெண்கள் பசியின்மை அல்லது புலிமியாவால் பாதிக்கப்படுவதற்கான வாய்ப்பு 10 மடங்கு அதிகம்.

இருப்பினும், சிறுவர்கள் மற்றும் ஆண்களிடையே உணவுக் குறைபாடுகள் அதிகமாகக் காணப்படுவதாகத் தெரிகிறது - அவர்கள் அதிகப்படியான உடற்பயிற்சியுடன் தொடர்புடைய தங்கள் குறைபாடுகளை உருவாக்க அதிக வாய்ப்புள்ளது மற்றும் மிகவும் ஒல்லியாக இருப்பதற்குப் பதிலாக இவர்கள் தசை வளர்ச்சியை விரும்புகின்றனர்.

அனோரெக்சியா நெர்வோசா

இதன் அறிகுறிகள் என்ன?

நீங்கள் இவற்றைக் காண்கிறீர்கள்:

• உங்கள் எடையைப் பற்றி மேலும் மேலும் கவலைப்படுகிறீர்கள்
• நாளுக்கு நாள் குறைவாகச் சாப்பிடுகிறீர்கள் - கலோரி எண்ணுதல்
• கலோரிகளை எரிக்க, அதிகமாக உடற்பயிற்சி செய்கிறீர்கள்
• உங்கள் வயது மற்றும் உயரத்திற்கு ஏற்ற பாதுகாப்பான எடையை விட நீங்கள் மிகவும் குறைவாக இருந்தாலும் கூட, எடை இழக்க விரும்புவதை உங்களால் தடுக்கமுடிவதில்லை
• உங்கள் எடையைக் குறைக்க அதிகமாக புகைபிடிக்கிறீர்கள் அல்லது சூயிங்கம் மெல்கிறீர்கள்
• கண்ணாடியில் உங்கள் எடை, வடிவம் அல்லது பிரதிபலிப்பை தீவிரமாகச் சரிபார்க்கிறீர்கள்
• சாப்பிடுவதை உள்ளடக்கிய சமூகச் சூழ்நிலைகளிலிருந்து விலகுகிறீர்கள்
• உடலை மறைக்கத் தளர்வான ஆடைகளை அணிகிறீர்கள்
• எடை பார்ப்பதற்கு முன் தண்ணீர் ஏற்றுகிறீர்கள்
• சில குறிப்பிட்ட உணவுக் குழுக்களைத் தவிர்க்கிறீர்கள், சில உணவுகளை "நல்லது" மற்றும் "கெட்டது" என்று பார்க்கிறீர்கள்
• உணவு நேரங்களைத் தவிர்க்கிறீர்கள், குறிப்பாக, பள்ளியில்
• பாலுறவில் ஆர்வம் இழக்கிறீர்கள்
  • சிறுமிகள் அல்லது பெண்களில் - மாதச் சுழற்சி ஒழுங்கற்றதாகிவிட்டது அல்லது நின்றுவிட்டது.
  • ஆண்கள் அல்லது சிறுவர்களில் - விறைப்புத்தன்மை மற்றும் ஈரமான கனவுகள் நின்றுவிட்டன, விதைப்பைகள் சுருங்கிவிட்டன.

சிலர் கடுமையான நடைமுறைகள் மற்றும் நேரங்களைப் பின்பற்ற வேண்டிய அவசியம், அல்லது ஒருவேளை 'மாசுபாடு' இருக்குமோ என்பது குறித்த பயம், எப்போதும் படிக்க அல்லது வேலை செய்ய வேண்டிய அவசியம், அல்லது பணத்தைச் சரியான முறையில் செலவழிப்பதில் சிரமம் போன்ற பிற தீவிரமான சிரமங்களை வளர்த்துக் கொண்டதைக் கவனிக்கிறார்கள்.

அது எப்போது தொடங்கும்?

எந்த வயதினருக்கும் பசியின்மை ஏற்படலாம் என்பது இப்போது நமக்குத் தெரியும், ஆனால் இது பொதுவாகப் பதின் பருவத்து ஆண்டுகளில் தொடங்குகிறது. இதனால் பாதிப்படைவோர் எண்ணிக்கை (சுமாராக):

• ஒவ்வொரு 150 பதினைந்து வயதுப் பெண்களிலும் 1
• ஒவ்வொரு 1000 பதினைந்து வயதுப் பையன்களிலும் 1.

என்ன நடக்கிறது?

• நீங்கள் ஒவ்வொரு நாளும் மிகக் குறைந்த கலோரிகளை உட்கொள்கிறீர்கள். நீங்கள் "ஆரோக்கியமாக"ச் சாப்பிடுகிறீர்கள் - பழங்கள், காய்கறிகள் மற்றும் சாலடுகள் - ஆனால் அவை உங்கள் உடலுக்குப் போதுமான சக்தியைத் தருவதில்லை.
• உங்கள் எடையைக் குறைக்க நீங்கள் உடற்பயிற்சி செய்யலாம், எடையைக் குறைக்கும் மாத்திரைகளைப் பயன்படுத்தலாம் அல்லது அதிகமாகப் புகைபிடிக்கலாம்.
• நீங்கள் சாப்பிட விரும்பவில்லை, ஆனால் நீங்கள் மற்றவர்களுக்காக உணவை வாங்கிச் சமைக்கிறீர்கள்.
• நீங்கள் இன்னும் எப்போதும் போல் பசியுடன் இருக்கிறீர்கள், உண்மையில் நீங்கள் உணவைப் பற்றி யோசிப்பதை நிறுத்த முடியாது என்பதை நீங்கள் காண்கிறீர்கள்.
• எடை அதிகரிப்பதைப் பற்றி நீங்கள் அதிகமாகப் பயப்படுகிறீர்கள், மேலும் உங்கள் எடையை இயல்பை விடக் குறைவாக வைத்திருப்பதில் அதிக உறுதியாக இருக்கிறீர்கள்.
• உங்கள் மெலிந்த நிலை மற்றும் எடை இழப்பை முதலில் கவனிப்பவர்கள் உங்கள் குடும்பத்தினராக இருக்கலாம்.
• நீங்கள் சாப்பிடும் உண்மையான அளவு மற்றும் எவ்வளவு எடை இழக்கிறீர்கள் என்பதை மற்றவர்களிடம் சொல்ல முடியாமல் போகலாம்.
• நீங்கள் அனுமதிக்கத் திட்டமிடாத எதையும் சாப்பிட்டாலும், குறிப்பாக உங்கள் சாப்பிடுதலின் கட்டுப்பாட்டை இழந்து நீங்கள் அதிகமாகச் சாப்பிடுவதைக் கண்டால், நீங்கள் உங்களை நோய்வாய்ப்படுத்திக்கொள்ளலாம். இருப்பினும், இது புலிமியா நெர்வோசா என்று அழைக்கப்படுவதை விட 'அனோரெக்சியா, அதிகப்படியான-வெளியேற்ற துணை வகை' என்று அழைக்கப்படுகிறது. புலிமியா நெர்வோசாவால் பாதிக்கப்பட்டவர்கள் வரையறையின்படி இயல்பான எடை வரம்பில் உள்ளனர்.

புலிமியா நெர்வோசா

இதன் அறிகுறிகள் என்ன?

நீங்கள் இவற்றைக் காண்கிறீர்கள்:

• உங்கள் எடையைப் பற்றி மேலும் மேலும் கவலைப்படுகிறீர்கள்
• அதிகமாகச் சாப்பிடுகிறீர்கள் (கீழே காண்க)
• கலோரிகளைக் குறைக்க உங்களை வாந்தி எடுக்கச் செய்துகொள்கிறீர்கள் மற்றும்/அல்லது மலமிளக்கிகள் அல்லது வேறு வழிகளைப் பயன்படுத்துகிறீர்கள்
• ஒழுங்கற்ற மாதச் சுழற்சிகள் உள்ளன
• களைப்பாக உணர்கிறீர்கள்
• குற்ற உணர்வுடன் இருக்கிறீர்கள்
• நீங்கள் உணவுக் கட்டுப்பாட்டு முயற்சிகளை மேற்கொண்டபோதும், இயல்பான ஓர் எடையில் இருக்கிறீர்கள்.

அது எப்போது தொடங்கும்?

புலிமியா நெர்வோசா பெரும்பாலும் பதின்ம வயதின் நடுப்பகுதியில் தொடங்குகிறது. இருப்பினும், உதவி கேட்கத் தெரியாததால் மக்கள் பல வருடங்கள் உடல்நிலை சரியில்லாமல் இருக்கலாம். மக்கள் பெரும்பாலும் தங்கள் வாழ்க்கையில் மாற்றங்கள் ஏற்படும்போது - ஒரு புதிய உறவின் தொடக்கத்திலோ முதல் முறையாக மற்றவர்களுடன் வாழ வேண்டியிருக்கும்போதோ - உதவியை நாடுகிறார்கள்.

ஒவ்வொரு 100 பெண்களில் சுமார் 4 பேர் தங்கள் வாழ்க்கையின் ஒரு கட்டத்தில் புலிமியாவால் பாதிக்கப்படுகின்றனர், ஆண்களில் இந்த எண்ணிக்கை குறைவு.

அதிகமாகச் சாப்பிடுதல்

• நீங்கள் குளிர்சாதனப் பெட்டியைத் தேடுகிறீர்கள் அல்லது வெளியே சென்று வழக்கமாகத் தவிர்க்கும் கொழுப்பை அதிகரிக்கும் உணவுகளை வாங்குகிறீர்கள்.
• பின்னர் நீங்கள் அதையெல்லாம் விரைவாக, பொதுவாக ரகசியமாகச் சாப்பிடுவீர்கள்.
• நீங்கள் ஒரு சில மணி நேரங்களுக்குள் பிஸ்கட் பாக்கெட்டுகள், பல சாக்லேட் பெட்டிகள் மற்றும் பல கேக்குகளைச் சாப்பிட்டுவிடலாம்.
• அதிகமாகச் சாப்பிட வேண்டும் என்ற உந்துதலைத் தணிக்க நீங்கள் வேறொருவரின் உணவைக்கூட எடுத்துக்கொள்ளலாம், அல்லது, கடையில் இருந்து திருடலாம்.
• அதிகமாகச் சாப்பிடுவது ஒரு திட்டமிட்ட உணவாகத் தொடங்கலாம், ஆனால் நீங்கள் சாப்பிடுவதைக் கட்டுப்படுத்துவதால், ஒரு சாதாரண உணவு உங்களைத் திருப்திப்படுத்துவதில்லை, அதனால் நீங்கள் சாப்பிடுவதை நிறுத்த முடியாது.
• அதன் பிறகு நீங்கள் உடல் முழுவதும் நிரம்பியதாகவும், வீங்கியதாகவும் உணர்கிறீர்கள். மேலும், நீங்கள் குற்ற உணர்ச்சியுடனும், மனச்சோர்வுடனும் இருக்கலாம். நீங்கள் சாப்பிட்ட உணவை நீங்களே வாந்தி எடுப்பதன் மூலமோ மலமிளக்கிகளால் மலமிளக்கி எடுப்பதன் மூலமோ வெளியேற்ற முயல்கிறீர்கள். இது மிகவும் சங்கடமாகவும் சோர்வாகவும் இருக்கிறது, ஆனால் நீங்கள் அதிகமாகச் சாப்பிடுவது, வாந்தி எடுப்பது மற்றும்/அல்லது மலம் கழிப்பது போன்ற வழக்கத்தில் சிக்கிக் கொள்கிறீர்கள்.

அதிகமாக உண்ணும் குறைபாடு

இந்தக் குறைபாட்டால் நீங்கள் அவதிப்பட்டால், நீங்கள் உணவுக் கட்டுப்பாட்டில் இருப்பீர்கள், அதிகமாக சாப்பிடுவீர்கள், ஆனால் உங்களை வாந்தி எடுக்க வைக்க மாட்டீர்கள். 

இது மிகவும் துன்பமளிக்கிறது, மேலும், உங்கள் எடை மிகவும் கூடலாம்.

இதற்கு உளவியல் சிகிச்சைகள் உதவியாக இருக்கலாம். மேலும், உங்கள் பொதுப் பின்பற்றுநர் உங்களை IAPT (உளவியல் சிகிச்சைகளுக்கான அணுகலை மேம்படுத்துதல்) சேவைக்குப் பரிந்துரைக்கலாம்.

இந்தக் குறைபாட்டுக்கான சிகிச்சையைப் பற்றி மேலும் அறிய, NHS Choices வலைத்தளத்தைப்பார்வையிடவும்.

பசியின்மை மற்றும் புலிமியா உங்களை எவ்வாறு பாதிக்கும்?

உங்களுக்குப் போதுமான கலோரிகள் கிடைக்கவில்லை என்றால், நீங்கள்:

உளவியல் அறிகுறிகள்

• மோசமாகத் தூங்கலாம்.
• உணவு அல்லது கலோரிகளைத் தவிர வேறு எதையும் பற்றிக் கவனம் செலுத்துவது அல்லது தெளிவாக சிந்திப்பதைக் கடினமாக உணரலாம்.
• மனச்சோர்வடைந்ததாக உணரலாம்.
• மற்றவர்கள் மீதான ஆர்வத்தை இழக்கலாம்.
• உணவு மற்றும் சாப்பிடுவதில் (சில சமயங்களில் கழுவுதல், சுத்தம் செய்தல் அல்லது நேர்த்தியாக வைத்திருத்தல் போன்ற பிற விஷயங்களில்) தீவிரமாக இருக்கலாம்.

உடல் அறிகுறிகள்

• உங்கள் வயிறு சுருங்கிவிட்டதால் சாப்பிடக் கடினமாக உணரலாம்.
• உங்கள் உடலின் வளர்சிதை மாற்றம் குறைவதால் சோர்வாகவும், பலவீனமாகவும், குளிராகவும் உணரலாம்.
• மலச்சிக்கலை எதிர்கொள்ளலாம்.
• உங்கள் தலைமுடி மற்றும் தோலில் ஏற்படும் மாற்றங்களைக் கவனிக்கலாம். சிலருக்குத் தலை முடி உதிர்ந்து விடும், ஆனால் உடலின் மற்ற பகுதிகளில் கீழ்நோக்கி முடி வளரும். தோல் வறண்டு போகலாம், உங்களுக்கு அழுத்தப் புண்கள் ஏற்படலாம்.
• உங்கள் முழு உயரத்திற்கு வளராமலிருக்கலாம், அல்லது 'குனிந்த' தோற்றத்துடன் உயரத்தை இழக்கலாம்.
• எளிதில் உடையக்கூடிய எலும்புகளைப் பெறலாம்.
• கர்ப்பம் அடைய இயலாத நிலையில் இருக்கலாம்.
• உங்கள் கல்லீரலைச் சேதப்படுத்திக்கொள்ளலாம், குறிப்பாக நீங்கள் மது அருந்தினால்.
• கடுமையான சந்தர்ப்பங்களில், நீங்கள் இறக்கக்கூடும். எந்தவோர் உளவியல் குறைபாட்டையும்விட அனோரெக்சியா நெர்வோசா அதிக இறப்பு விகிதத்தைக் கொண்டுள்ளது.

நீங்கள் வாந்தி எடுத்தால், நீங்கள்:

• உங்கள் பற்களில் உள்ள எனாமலை இழக்கலாம் (இது உங்கள் வாந்தியில் உள்ள வயிற்று அமிலத்தால் கரைக்கப்படுகிறது)
• முகம் வீங்கக் காணலாம் (கன்னங்களில் உள்ள உமிழ்நீர்ச் சுரப்பிகள் வீங்குதல்)
• உங்கள் இதயம் ஒழுங்கற்ற முறையில் துடிப்பதைக் கவனிக்கலாம் - படபடப்பு (வாந்தி உங்கள் இரத்தத்தில் உள்ள உப்புகளின் சமநிலையைச் சீர்குலைக்கிறது)
• பலவீனமாக உணரலாம்
• எப்போதும் சோர்வாக உணரலாம்
• எடையில் பெரிய ஏற்ற இறக்கங்களை அனுபவிக்கலாம் (கீழே காண்க)
• உங்கள் சிறுநீரகங்களைச் சேதப்படுத்திக்கொள்ளலாம்
• வலிப்பு நிகழ்வுகளை எதிர்கொள்ளலாம்
• கர்ப்பமாக இயலாமல் போகலாம்.

நீங்கள் அதிக அளவு மலமிளக்கிகளைப் பயன்படுத்தினால், நீங்கள்:

• தொடர்ந்து வயிற்று வலியை எதிர்கொள்ளலாம்
• விரல்கள் வீங்கிவிடலாம்
• மலமிளக்கியைப் பயன்படுத்தாமல் இனிமேல் கழிப்பறைக்குச் செல்ல முடியாது என்று உணரலாம் (மலமிளக்கியை எப்போதும் பயன்படுத்துவது உங்கள் குடலில் உள்ள தசைகளைச் சேதப்படுத்தும்)
• பெரிய எடை ஊசலாட்டங்களைக் காண்பீர்கள். நீங்கள் உடல் சுத்தம் செய்யும்போது நிறையத் திரவத்தை இழக்கிறீர்கள், ஆனால் பின்னர் தண்ணீர் குடிக்கும்போது அதை மீண்டும் எடுத்துக் கொள்வீர்கள் (மலமிளக்கியைப் பயன்படுத்தும்போது எந்தக் கலோரிகளும் இழக்கப்படுவதில்லை).

உணவுக் குறைபாடுகளுக்கு என்ன காரணம்?

இந்தக் கேள்விக்கு எளிமையான பதில் எதுவும் இல்லை. ஆனால், இந்தக் கருத்துகள் அனைத்தும் விளக்கங்களாகக் கூறப்பட்டுள்ளன:

• மரபியல்: உணவுக் குறைபாடுகள் குடும்பங்களில் நிகழ்கின்றன என்பதற்கு நிறையச் சான்றுகள் உள்ளன. இதற்குப் பாதிக்கப்பட்டவர்கள் ஒன்றாக வாழ வேண்டிய அவசியமில்லை. சில மரபணுக்கள் மக்களை உணவுக் குறைபாடுகளுக்கு மட்டுமல்ல, தொடர்புடைய நிலைமைகளுக்கும் அதிகப் பாதிப்புக்குள்ளாக்குகின்றன என்பதற்கும் நிறையச் சான்றுகள் உள்ளன.
• "அணைக்கும்" விசை இல்லாதது: நம்மில் பலர் நிறைய உணவுக் கட்டுப்பாடுகளைப் பின்பற்றலாம். ஆனால் இதெல்லாம், மீண்டும் சாப்பிடும் நேரம் வந்துவிட்டது என்று நம் உடல் நமக்குச் சொல்கிறவரையில்தான். பசியின்மை உள்ள சிலருக்கு இந்த உடல் "விசை" இல்லாமல் இருக்கலாம், மேலும் நீண்ட காலத்திற்கு அவர்களின் உடல் எடையை ஆபத்தான முறையில் குறைவாக வைத்திருக்கலாம்.
• கட்டுப்பாடு: உணவுக் கட்டுப்பாட்டில் இருப்பது மிகவும் மன நிறைவைக் கொடுக்கலாம். எடை குறைவு என்று எடை அளவுகள் சொல்லும்போது தோன்றுகிற சாதனை உணர்வு நம்மில் பெரும்பாலானோருக்குத் தெரியும். நம்மை நாமே தெளிவாகவும், புலப்படும் வகையிலும் கட்டுப்படுத்திக் கொள்ள முடியும் என்பதை உணர்வது நல்லது. உங்கள் வாழ்க்கையில் எடையைமட்டும்தான் உங்களால் கட்டுப்படுத்த இயலுகிறது என்று நீங்கள் உணரலாம்.
• பருவமடைதல்: ஆண்களில் அந்தரங்க மற்றும் முக முடி, பெண்களில் மார்பகங்கள் மற்றும் மாதச் சுழற்சி... இப்படி வயது வந்தவராக மாறும்போது ஏற்படும் சில உடல் மாற்றங்களைப் பசியின்மை மாற்றியமைக்கலாம். இது வயதாகும்போது ஏற்படும் தேவைகளை, குறிப்பாகப் பாலியல் தேவைகளைத் தள்ளிப் போட உதவலாம்.
• சமூக அழுத்தம்: நமது சமூகச் சூழல்கள் நமது நடத்தையை வலுவாகப் பாதிக்கின்றன. மெலிந்திருப்பதை மதிக்காத சமூகங்களில் உணவுக் குறைபாடுகள் குறைவாகவே உள்ளன. பாலே பள்ளிகள் போன்ற, மெல்லிய தன்மை மதிக்கப்படும் இடங்களில் அதிக உணவுக் குறைபாடுகள் உள்ளன. மேற்கத்தியக் கலாச்சாரத்தில் 'மெல்லியதே அழகு'. தொலைக்காட்சி, செய்தித்தாள்கள் மற்றும் பத்திரிகைகள் இலட்சியப்படுத்தப்பட்ட, செயற்கையாக மெலிந்த மக்களின் படங்களைக் காட்டுகின்றன. எதிர்மறையான உடல் பிம்பம் கொண்ட ஒருவருக்கு உடற்பயிற்சிக் கூடங்கள் மற்றும் நலக் குழுக்கள்கூட இந்தக் கருத்தை வலுப்படுத்தலாம். எனவே நம்மில் பெரும்பாலானோர் ஏதாவது ஒரு நேரத்தில் உணவுக் கட்டுப்பாட்டை முயல்கிறோம். நம்மில் சிலர் அதிகமான உணவுக் கட்டுப்பாட்டை மேற்கொள்ளலாம், ஆனால் உணவுக் குறைபாடு ஏற்படும் அபாயத்தில் இருக்கும் ஒருவருக்கு இது உணவுக் கட்டுப்பாட்டை ஆபத்தானதாக மாற்றும், மேலும் அந்த நபருக்குப் பசியின்மை ஏற்படக்கூடும்.
• குடும்பம்: மற்றவர்களுடன் சேர்ந்து சாப்பிடுவது நம் வாழ்வின் ஒரு முக்கியப் பகுதியாகும். உணவை ஏற்றுக்கொள்வது மகிழ்ச்சியைத் தருகிறது, அதை மறுப்பது பெரும்பாலும் ஒருவரை வருத்தப்படுத்தும். குறிப்பாக, குடும்பங்களுக்குள் இது உண்மை. உணவை "வேண்டாம்" என்று சொல்வதுதான் உங்கள் உணர்வுகளை வெளிப்படுத்த அல்லது குடும்ப விவகாரங்களில் ஏதேனும் பங்கு வகிக்க ஒரே வழி என்று நீங்கள் நினைக்கலாம். கவனித்துக்கொள்பவருக்கும் பாதிக்கப்பட்டவருக்கும் இடையில் திறந்த மற்றும் நேர்மையான தகவல் தொடர்பு அவசியம். அதிகமாகத் தீர்ப்பளிக்காமல் இருப்பதும் முக்கியம். மறுபுறம், அன்பான குடும்பங்கள் பெரும்பாலும் உணவுக் குறைபாட்டின் விளைவுகளிலிருந்து உங்களைப் பாதுகாக்க முயற்சி செய்கின்றன, இதனால் உணவுக் குறைபாடு நீண்ட நாள் நீடிக்கலாம்.
• மனச்சோர்வு: நம்மில் பெரும்பாலானோர் வருத்தமாக இருக்கும்போது அல்லது சலிப்பாக இருக்கும்போது கூட ஆறுதலுக்காகச் சாப்பிட்டிருக்கிறோம். புலிமியா உள்ளவர்கள் பெரும்பாலும் மனச்சோர்வடைந்துள்ளனர், மேலும் அதிகப்படியான மது அருந்துதல் மகிழ்ச்சியற்ற உணர்வுகளைச் சமாளிப்பதற்கான ஒரு வழியாகத் தொடங்கலாம். துரதிர்ஷ்டவசமாக, வாந்தி மற்றும் மலமிளக்கிகளைப் பயன்படுத்துவது உங்களை மோசமாக உணர வைக்கும்.
• குறைந்த சுயமரியாதை: பசியின்மை மற்றும் புலிமியா உள்ளவர்கள் பெரும்பாலும் தங்களைப் பற்றி அதிகம் நினைப்பதில்லை, மேலும் மற்றவர்களுடன் தங்களைச் சாதகமாக ஒப்பிடுவதில்லை. எடை இழப்பது மரியாதை மற்றும் சுய மதிப்பு உணர்வைப் பெற முயலும் ஒரு வழியாக இருக்கலாம்.
• உணர்வுத் துன்பம்: கெட்ட விஷயங்கள் நடக்கும்போது அல்லது நம் வாழ்க்கை மாறும்போது நாம் அனைவரும் வித்தியாசமாக நடந்துகொள்கிறோம். பசியின்மை மற்றும் புலிமியா இவற்றுடன் தொடர்புடையவை:
  • வாழ்க்கைச் சிரமங்கள்
  • பாலியல் அடிப்படையில் தவறாகப் பயன்படுத்தப்படுதல்
  • உடல் நோய்
  • வருத்தமளிக்கும் நிகழ்வுகள் - மரணம் அல்லது உறவின் முறிவு
  • முக்கியமான நிகழ்வுகள் - திருமணம் அல்லது வீட்டை விட்டு வெளியேறுதல்.
• தீய வட்டம்: ஆரம்ப மன அழுத்தம் அல்லது அதற்கான காரணம் கடந்துவிட்டாலும் கூட உணவுக் குறைபாடு தொடரலாம். உங்கள் வயிறு சுருங்கிவிட்டால், சாப்பிடுவதற்கு வசதியின்றியும் பயமாகவும் உணரலாம்.
• உடல் ரீதியான காரணங்கள்: சில மருத்துவர்கள் நமக்கு இன்னும் புரியாத உடல் ரீதியான ஒரு காரணம் இருக்கலாம் என்று நினைக்கிறார்கள்.
• சில நோய்கள் மற்றும் சிகிச்சைகள்: நீரிழிவு நோய், சிஸ்டிக் ஃபைப்ரோஸிஸ் அல்லது உணவுமுறையைக் கண்காணிக்க வேண்டிய மற்றும் போதுமான சிகிச்சை இல்லாமல் எடை இழக்கப்படுகிற பிற நோய்களால் பாதிக்கப்பட்டவர்களுக்குப் பசியின்மை ஏற்படுவதற்கான வாய்ப்புகள் ஒப்பீட்டளவில் அதிகமாக உள்ளன. குறிப்பாக, நீங்கள் கொஞ்சம் எடையைக் குறைப்பதற்காக உங்கள் உடல்நலத்தைப் புறக்கணிக்கத் தூண்டப்படலாம்; இது ஆபத்தானது.

ஆண்கள், சிறப்புத் தேவைகள் உள்ளவர்கள் மற்றும் இளைய குழந்தைகள்

ஆண்களுக்கு இது வேறுபட்டதா?

• உணவுக் குறைபாடுகள் சிறுவர்கள் மற்றும் ஆண்களிடையில் அதிகமாகக் காணப்படுவதாகத் தெரிகிறது.
• குறைந்த உடல் எடை (அல்லது குறைந்த உடல் கொழுப்பு) தேவைப்படும் தொழில்களில் உணவுக் குறைபாடுகள் அதிகமாகக் காணப்படுகின்றன. இதில் குதிரைச் சவாரி, உடற்கட்டமைப்பு, மல்யுத்தம், குத்துச்சண்டை, நடனம், நீச்சல், தடகளம் மற்றும் படகோட்டுதல் ஆகியவை அடங்கும்.
• ஆண்கள் இப்போது உணவுக் குறைபாடுகளைப் பற்றி அமைதியாக இருப்பதற்குப் பதிலாக உதவியை நாடுகிறார்கள்.

சிறப்புத் தேவைகள் உள்ளவர்கள் மற்றும் இளைய குழந்தைகள்

கற்றல் சிரமம், மன இறுக்கம் அல்லது வேறு சில வளர்ச்சிப் பிரச்சினைகள் சாப்பிடுவதைத் தடுக்கலாம். உதாரணமாக, ஆட்டிசம் உள்ள சிலர் உணவுகளின் நிறம் அல்லது அமைப்பை வெறுத்து அவற்றை சாப்பிட மறுக்கலாம்.

பதின்பருவத்து வயதிற்கு முந்தைய குழந்தைகளின் உணவுப் பிரச்சினைகள், மிகவும் ஒல்லியாக இருக்க விரும்புவதை விட, உணவு அமைப்பு, "தேர்ந்தெடுத்துச் சாப்பிடுதல்" அல்லது கோபமாக இருப்பது போன்றவற்றுடன் தொடர்புடையவை. இந்தப் பிரச்சினைகளுக்கு உதவும் வழிகள் அனோரெக்சியா மற்றும் புலிமியாவிற்கான வழிகளிலிருந்து மிகவும் வேறுபட்டவை.

எனக்கு ஏதாவது பிரச்சனையா?

மருத்துவர்கள் பயன்படுத்தும் 'SCOFF' கேள்வித்தாள் இவ்வாறு கேட்கிறது:

• நீங்கள் வயிறு நிரம்பிவிட்டதாக உணரும்போது, அதை எண்ணி வருந்தி உங்களை நோய்வாய்ப்படுத்திக்கொள்கிறீர்களா?
• நீங்கள் எவ்வளவு சாப்பிடுகிறீர்கள் என்பதை உங்களால் கட்டுப்படுத்த இயலவில்லை என்று கவலைப்படுகிறீர்களா?
• நீங்கள் சமீபத்தில் மூன்று மாதங்களில் 6 கிலோகிராம்களுக்கு மேல் (சுமார் ஒரு கல்) எடையைக் குறைத்துள்ளீர்களா?
• நீங்கள் ஒல்லியாக இருப்பதாகப் பிறர் சொன்னாலும், நீங்கள் குண்டாக இருப்பதாக நீங்கள் நம்புகிறீர்களா?
• உங்கள் வாழ்க்கையில் உணவு ஆதிக்கம் செலுத்துவதாக நீங்கள் சொல்வீர்களா?

இந்தக் கேள்விகளில் இரண்டு அல்லது அதற்கு மேற்பட்டவற்றுக்கு நீங்கள் "ஆம்" என்று பதிலளித்தால், உங்களுக்கு உணவுக் குறைபாடு இருக்கலாம்.

எனக்கு நானே உதவிக்கொள்வது எப்படி?

சில சமயங்களில் புலிமியாவை ஒரு குணப்படுத்துபவரின் வழிகாட்டுதலுடன் தன்னுதவிக் கையேட்டைப் பயன்படுத்திச் சமாளிக்க முடியும்.

பசியின்மைக்குப் பொதுவாக ஒரு மருத்துவமனை அல்லது குணப்படுத்துபவரிடமிருந்து மிகவும் ஒழுங்கமைக்கப்பட்ட உதவி தேவைப்படுகிறது. உங்களுக்கான சிறந்த தேர்வுகளை நீங்களே செய்ய, விருப்பங்களைப் பற்றி முடிந்தவரை தகவல்களைப் பெறுவது இன்னும் மதிப்புக்குரியது.

இவற்றைச் செய்யுங்கள்:

• வழக்கமான உணவு நேரங்களைக் கடைபிடியுங்கள் - காலை உணவு, மதிய உணவு மற்றும் இரவு உணவு. உங்கள் எடை மிகவும் குறைவாக இருந்தால், காலை, மதியம் மற்றும் இரவு நேரச் சிற்றுண்டிகளையும் சாப்பிடுங்கள்.
• ஆரோக்கியமான உணவு முறையை நோக்கி நீங்கள் எடுக்கக்கூடிய ஒரு சிறிய படியைப் பற்றி யோசித்துப் பாருங்கள். காலை உணவைச் சாப்பிட முடியாவிட்டால், காலை உணவு நேரத்தில் சில நிமிடங்கள் மேஜையில் உட்காருங்கள், ஒரு குவளை தண்ணீர் குடிக்க முயற்சி செய்யுங்கள். இதைச் செய்யப் பழகியபிறகு, கொஞ்சம் சாப்பிடுங்கள், பாதி ரொட்டித் துண்டு சாப்பிட்டால்கூடப் போதும் - ஆனால் அதை ஒவ்வொரு நாளும் செய்யுங்கள்.
• நீங்கள் என்ன சாப்பிடுகிறீர்கள், எப்போது சாப்பிடுகிறீர்கள், உங்கள் எண்ணங்கள் மற்றும் உணர்வுகள் என்ன என்பதை ஒவ்வொரு நாளும் ஒரு நாட்குறிப்பில் எழுதி வைத்துக் கொள்ளுங்கள். நீங்கள் எப்படி உணர்கிறீர்கள், என்ன சிந்திக்கிறீர்கள், எப்படிச் சாப்பிடுகிறீர்கள் என்வற்றுக்கு இடையில் தொடர்புகள் உண்டா என்பதைப் பார்க்க இதைப் பயன்படுத்தலாம்.
• நீங்கள் என்ன சாப்பிடுகிறீர்கள் அல்லது என்ன சாப்பிடவில்லை என்பதைப் பற்றி உங்களுடனும் மற்றவர்களுடனும் வெளிப்படையாக இருக்க முயற்சி செய்யுங்கள். உணவுக் குறைபாட்டின் மிகவும் தனிமைப்படுத்தும் அம்சங்களில் ஒன்று, இரகசியம்.
• நீங்கள் எப்போதும் சாதனை படைத்துக்கொண்டே இருக்க வேண்டியதில்லை என்பதை உங்களுக்கே நினைவூட்டிக் கொள்ளுங்கள் - அவ்வப்போது சாதனையெல்லாம் இன்றி இயல்பாக இருங்கள்.
• நீங்கள் அதிக எடையைக் குறைத்தால், குறுகிய காலத்தில் நீங்கள் நன்றாக உணரக்கூடும் என்றாலும், நடுத்தரக் காலத்தில் நீங்கள் அதிகப் பதற்றத்தையும் மனச்சோர்வையும் உணர்வீர்கள் என்பதை நீங்களே நினைவூட்டிக் கொள்ளுங்கள்.
• இரண்டு பட்டியல்களை உருவாக்குங்கள் - உங்கள் உணவுக் குறைபாடு உங்களுக்கு என்ன கொடுத்தது, மற்றொன்று அதன் மூலம் நீங்கள் இழந்தது. இதற்கு ஒரு தன்னுதவிப் புத்தகம் உங்களுக்கு உதவலாம்.
• உங்கள் உடலிடம் கருணை காட்ட முயற்சி செய்யுங்கள், அதைத் தண்டிக்காதீர்கள்.
• உங்களுக்கேற்ற சரியான எடை என்னவென்று உங்களுக்குத் தெரியுமா என்பதையும், அதற்கான காரணத்தை நீங்கள் புரிந்துகொண்டிருக்கிறீர்களா என்பதையும் உறுதிப்படுத்திக் கொள்ளுங்கள்.
• மற்றவர்களின் மீட்பு அனுபவங்களின் கதைகளைப் படியுங்கள். இவற்றை நீங்கள் தன்னுதவிப் புத்தகங்களிலோ இணையத்திலோ காணலாம்.
• B-eatபோன்ற ஒரு தன்னுதவிக் குழுவில் சேருவது பற்றி யோசியுங்கள். உங்கள் பொதுப் பின்பற்றுநரும் அப்படி ஒன்றை பரிந்துரைக்கலாம்.
• உடல் எடையைக் குறைத்து, மிகக் குறைந்த உடல் எடையில் இருக்க ஊக்குவிக்கும் வலைத்தளங்கள் அல்லது சமூக வலைப்பின்னல்களைத் தவிர்க்கவும். அவர்கள் உங்கள் உடல்நலத்திற்குத் தீங்கு விளைவிக்க ஊக்குவிக்கிறார்கள், ஆனால் நீங்கள் நோய்வாய்ப்படும்போது எந்த உதவியும் செய்ய மாட்டார்கள்.

இவற்றைச் செய்யாதீர்கள்:

• வாரத்திற்கு ஒரு முறைக்கு மேல் எடை பார்க்காதீர்கள்.
• உங்கள் உடலைப் பரிசோதித்து, கண்ணாடியில் உங்களைப் பார்த்து நேரத்தை வீணாக்காதீர்கள். யாரும் கச்சிதமானவர்கள் இல்லை. நீங்கள் உங்களை எவ்வளவு நேரம் உற்றுப் பார்க்கிறீர்களோ, அந்த அளவுக்கு உங்களுக்குப் பிடிக்காத ஒன்றைக் கண்டுபிடிக்கும் வாய்ப்பு அதிகம். தொடர்ந்து சோதித்துப் பார்ப்பது மிகவும் கவர்ச்சிகரமான நபரைக்கூட அவர்களின் தோற்றத்தில் அதிருப்தி அடையச் செய்யலாம்.
• குடும்பத்தினரிடமிருந்தும் நண்பர்களிடமிருந்தும் உங்களைத் துண்டித்துக் கொள்ளாதீர்கள். நீங்கள் மிகவும் ஒல்லியாக இருப்பதாக அவர்கள் நினைப்பதால் நீங்கள் இதை விரும்பலாம், ஆனால் அவர்கள் உங்களுக்கு ஓர் உயிர்நாடியாக இருக்கலாம்.

எனக்கு உதவி கிடைக்காவிட்டால் அல்லது நான் என் உணவுப் பழக்கத்தை மாற்றாவிட்டால் என்ன ஆகும்?

கடுமையான உணவுக் குறைபாடு உள்ள பெரும்பாலான மக்கள் இறுதியில் ஏதாவது ஒரு சிகிச்சையைப் பெறுவார்கள்; எனவே எதுவும் செய்யாவிட்டால் என்ன நடக்கும் என்பது தெளிவாகத் தெரியவில்லை.

இருப்பினும், பெரும்பாலான கடுமையான உணவுக் குறைபாடுகள் தாங்களாகவே குணமடைவதில்லை என்பது போல் தெரிகிறது.

பசியின்மையால் பாதிக்கப்பட்ட சிலர் இறந்துவிடுவார்கள்.

குறைந்த எடையில் உடற்பயிற்சி செய்வது ஆபத்தானது, குறிப்பாக நீங்கள் குளிர்ந்த காலநிலையில் வெளியில் உடற்பயிற்சி செய்தால்.

பசியின்மைக்குத் தொழில்முறை உதவி பெறுதல்

உங்கள் பொதுப் பின்பற்றுநர் உங்களை ஒரு சிறப்பு ஆலோசகர், மன நல மருத்துவர் அல்லது உளவியலாளரிடம் பரிந்துரைக்கலாம்.

நீங்கள் ஒரு தனியார் குணப்படுத்துபவர், தன்னுதவிக் குழு அல்லது மருத்துவமனையைத் தேர்வு செய்யலாம், ஆனால் என்ன நடக்கிறது என்பதை உங்கள் பொதுப் பின்பற்றுநரிடம் தெரிவிப்பது இன்னும் பாதுகாப்பானது.

நல்ல உடல் நலப் பரிசோதனை செய்து கொள்வது புத்திசாலித்தனம். உங்கள் உணவுக் குறைபாடு உடல் ரீதியான பிரச்சினைகளை ஏற்படுத்தியிருக்கலாம். அரிதாக, அடையாளம் காணப்படாத மருத்துவ நிலை உங்களுக்கு இருக்கலாம்.

உங்களுக்கு மிகவும் பயனுள்ள சிகிச்சைகள் உங்கள் குறிப்பிட்ட அறிகுறிகள், உங்கள் வயது மற்றும் உங்கள் சூழ்நிலையைப் பொறுத்தவை.

பசியின்மைக்குப் பரிந்துரைக்கப்பட்ட பிறகு முதல் படிகள்

• ஒரு மன நல மருத்துவர் அல்லது உளவியலாளர் முதலில் உங்களுடன் பேச விரும்புவார், பிரச்சனை எப்போது தொடங்கியது, அது எவ்வாறு வளர்ந்தது என்பதைக் கண்டறிவதற்காக. உங்கள் எடை பார்க்கப்படும், மேலும் நீங்கள் எவ்வளவு எடை குறைத்துள்ளீர்கள் என்பதைப் பொறுத்து உங்களுக்கு உடல் பரிசோதனை மற்றும் இரத்தப் பரிசோதனைகள் தேவைப்படலாம். உங்கள் அனுமதியுடன் மன நல மருத்துவர் உங்கள் குடும்பத்தினருடன் (இயன்றால் ஒரு நண்பருடனும்) பேசி, இந்தப் பிரச்சினையில் அவர்கள் வழங்கும் கூடுதல் கருத்துகளை அறிந்துகொள்ள விரும்புவார். நீங்கள் உங்கள் குடும்பத்தினரை இதில் ஈடுபடுத்த விரும்பவில்லை என்றால், மிக இளம் நோயாளிகளுக்குக்கூட இரகசியத்தன்மையைப் பேண உரிமை உண்டு. சில நேரங்களில், குடும்பத்தில் தவறாகப் பயன்படுத்துதல் அல்லது மன அழுத்தம் இருப்பதால் இது பொருத்தமானதாக இருக்கலாம்.
• நீங்கள் இன்னும் வீட்டிலேயே வசிக்கிறீர்கள் என்றால், குறைந்தபட்சம் முதலில் நீங்கள் என்ன உணவு சாப்பிடுகிறீர்கள் என்பதைச் சரிபார்க்கும் வேலையை உங்கள் பெற்றோர் பெறலாம். இது குடும்பத்தின் மற்றவர்களுடன் நீங்கள் தொடர்ந்து உணவு உட்கொள்வதையும், போதுமான கலோரிகளைப் பெறுவதையும் உறுதி செய்வதை உள்ளடக்குகிறது. உங்கள் எடையைச் சரிபார்க்கவும், ஆதரவிற்காகவும் நீங்கள் ஒரு குணப்படுத்துபவரைத் தொடர்ந்து சந்திப்பீர்கள்.
• இதைச் சமாளிப்பது சம்பந்தப்பட்ட அனைவருக்கும் மன அழுத்தத்தை ஏற்படுத்தும், எனவே உங்கள் குடும்பத்திற்கு ஆதரவு தேவைப்படலாம். அப்படியானால் முழுக் குடும்பமும் சிகிச்சை அமர்வுகளுக்கு ஒன்றாக வர வேண்டும் என்று பொருள் இல்லை (இருப்பினும், இது இளையவர்களுக்கு உதவியாக இருக்கும்). உங்கள் குடும்பத்தினர் பிரச்சினையைப் புரிந்துகொண்டு அதைச் சமாளிக்க உதவி பெற முடியும் என்பதே இதன் பொருள். இருப்பினும், பாதிக்கப்பட்டவர் மற்றும் மன நல மருத்துவருடன் பெற்றோரின் ஈடுபாடு சில சமயங்களில் குணமடைய உதவும்.
• உறவுகள், படிப்பு, வேலை அல்லது உங்கள் தன்னம்பிக்கைக்கான சவால்கள் என உங்களை வருத்தப்படுத்தும் எதையும் பற்றி விவாதிக்க உங்களுக்கு வாய்ப்பு கிடைக்கும்.
• முதலில், நீங்கள் சாதாரண எடைக்குத் திரும்புவது பற்றி யோசிக்க விரும்ப மாட்டீர்கள்; ஆனால் நீங்கள் நன்றாக உணர விரும்புவீர்கள் - மேலும் நன்றாக உணர, நீங்கள் ஆரோக்கியமான எடைக்குத் திரும்ப வேண்டும். நீங்கள் இவற்றைத் தெரிந்து கொள்ள வேண்டும்:
  • உங்கள் ஆரோக்கியமான எடை என்ன?
  • அங்கு செல்ல உங்களுக்கு ஒவ்வொரு நாளும் எவ்வளவு உணவு தேவை?
  • நீங்கள் பருமனாகாமல் இருப்பதை எப்படி உறுதி செய்வது?
  • உங்களால் உங்கள் உண்ணும் பழக்கத்தைக் கட்டுப்படுத்த முடியும் என்பதை எப்படி உறுதியாக நம்புவது?

பசியின்மைக்கான உளவியல் சிகிச்சை அல்லது ஆலோசனை

• இது ஒரு குணப்படுத்துபவரிடம் பேசுவதை உள்ளடக்கியது, அநேகமாக ஒவ்வொரு வாரமும் ஒரு மணிநேரம், உங்கள் எண்ணங்கள் மற்றும் உணர்வுகளைப் பற்றி நீங்கள் பேசுவீர்கள். பிரச்சனை எப்படி ஆரம்பித்தது என்பதைப் புரிந்துகொள்ளவும், விஷயங்களைப் பற்றி நீங்கள் சிந்திக்கும் மற்றும் உணரும் சில வழிகளை எவ்வாறு மாற்றலாம் என்பதைப் புரிந்துகொள்ளவும் இது உங்களுக்கு உதவும். சில விஷயங்களைப் பற்றிப் பேசுவது வருத்தமாக இருக்கலாம், ஆனால் ஒரு நல்ல குணப்படுத்துபவர் உங்கள் சிரமங்களைச் சிறப்பாகச் சமாளிக்க உதவும் வகையில் இதைச் செய்ய உங்களுக்கு உதவுவார். அத்துடன், அவை உங்களை அதிகமாக மதிக்கவும், உங்கள் சுயமரியாதையை மீண்டும் கட்டியெழுப்பவும் உதவும்.
• சிகிச்சையின் சவால்களால் அதிக மன அழுத்தத்திற்கு ஆளாகாமல், அவற்றிலிருந்து பயனடையும் அளவுக்கு நீங்கள் குணமடைந்தவுடன், அறிவாற்றல் பழகுமுறைச் சிகிச்சை மற்றும் ஒருவருக்கொருவர் பழகல் சிகிச்சையின்சிறப்புக் கவனம் செலுத்தப்பட்ட பதிப்புகள் பெரும்பாலும் வழங்கப்படுகின்றன. உங்கள் எடை குறைவாக இருக்கும்போது அல்லது குறையும்போது நீங்கள் சிகிச்சை எடுத்துக் கொண்டால், மன அழுத்தம் நிலைமையை மேம்படுத்துவதற்குப் பதிலாக மோசமாக்கும் என்று தெரிகிறது.
• சில நேரங்களில் இது ஒரே மாதிரியான பிரச்சனைகளைக் கொண்ட நபர்களை உடைய ஒரு சிறிய குழுவில் செய்யப்படலாம்.
• உங்கள் குடும்பத்தின் மற்ற உறுப்பினர்களை உங்கள் அனுமதியுடன் சேர்க்கலாம்.  பசியின்மைக்கான குடும்பச் சிகிச்சையின் சிறந்த ஆராய்ச்சி செய்யப்பட்ட வடிவம் 'மௌட்ஸ்லி மாதிரி' என்று அழைக்கப்படுகிறது. துணைவரைக் கொண்ட பெரியவர்களை ஒரு தம்பதியினராகக் கருதலாம். உறவினர்கள் மற்றும் பராமரிப்பாளர்கள் உங்களுக்கு என்ன நடந்தது, அவர்கள் உங்களுடன் எவ்வாறு இணைந்து பணியாற்ற முடியும், மற்றும் சூழ்நிலையை எவ்வாறு சமாளிக்க முடியும் என்பதைப் புரிந்துகொள்வதற்காக, இவர்கள் அவர்களை வேறு தனி அமர்வுகளில் சந்திக்கலாம்.
• இந்த வகையான சிகிச்சை சில மாதங்கள் அல்லது ஆண்டுகள் நீடிக்கலாம்.
• இந்த நடவடிக்கைகள் பலனளிக்கவில்லை என்றால், அல்லது உங்கள் எடை ஆபத்தான அளவில் குறைவாக இருந்தால் மட்டுமே மருத்துவர் மருத்துவமனையில் அனுமதிக்கப் பரிந்துரைப்பார்.

மருத்துவமனைச் சிகிச்சை

இது உங்கள் உணவைக் கட்டுப்படுத்துவதையும், பிரச்சினைகளைப் பற்றிப் பேசுவதையும் உள்ளடக்கியது, அதே நேரம் அது இன்னும் மேற்பார்வையிடப்பட்ட மற்றும் கட்டமைக்கப்பட்ட வழியில் செய்யப்படுகிறது.

• உங்களுக்கு இரத்த சோகை இருக்கிறதா அல்லது தொற்று ஏற்படும் அபாயம் உள்ளதா என்பதைச் சரிபார்க்க இரத்தப் பரிசோதனைகள் செய்யப்படும்.
• உங்கள் எடை மெதுவாக அதிகரிப்பதை உறுதி செய்ய - வழக்கமான எடைப் பரிசோதனைகள்.
• உங்கள் இதயம், நுரையீரல் மற்றும் எலும்புகளுக்கு ஏதேனும் சேதம் ஏற்பட்டுள்ளதா என்பதைக் கண்காணிக்கப் பிற உடல் பரிசோதனைகள் தேவைப்படலாம்.

உணவு மற்றும் உடற்பயிற்சி தொடர்பான ஆலோசனை மற்றும் உதவி

• ஆரோக்கியமான உணவுமுறை - நீங்கள் எவ்வளவு சாப்பிடுகிறீர்கள், ஆரோக்கியமாக இருக்கத் தேவையான அனைத்து ஊட்டச்சத்துக்களையும் நீங்கள் பெறுவதை எவ்வாறு உறுதி செய்வது என்பவை பற்றி விவாதிக்க ஓர் உணவியல் நிபுணர் உங்களைச் சந்திக்கலாம்.
• உங்கள் உடலில் அத்தியாவசிய ஊட்டச்சத்துக்கள் இல்லாமல் இருக்கலாம் என்பதால், சிறிது காலத்திற்கு உங்களுக்கு வைட்டமின் மற்றும் தாதுப்பொருட்கள் தேவைப்படலாம்.
• அதிகமாகச் சாப்பிடுவதன் மூலம் மட்டுமே நீங்கள் ஆரோக்கியமான எடையை மீண்டும் பெற முடியும், இது முதலில் மிகவும் கடினமாக இருக்கலாம். ஊழியர்கள் இவற்றில் உங்களுக்கு உதவுவார்கள்:
• எடை அதிகரிப்பதற்கு நியாயமான இலக்குகளை அமைக்க
• தொடர்ந்து சாப்பிட
• நீங்கள் உணரும் பதற்றத்தைச் சமாளிக்க
• உங்களுக்கு நல்லது செய்யும் உடற்பயிற்சியின் அளவு, வகை மற்றும் தீவிரம் குறித்து ஆலோசனை வழங்க, உங்கள் பொதுப் பின்பற்றுநர் உங்களை ஒரு தகுதிவாய்ந்த உடற்பயிற்சி உடலியல் நிபுணரிடம் பரிந்துரைக்க முடியும்.

பசியின்மைக்கான மருந்து வழங்கல்

நோயைக் கையாளும் போது நீங்கள் அனுபவிக்கும் பதற்றத்தைக் குறைக்கவும், குறிப்பாக, பாதிக்கப்பட்டவர்கள் விவரிக்கும் 'சிந்தனைகளைக்' குறைக்கவும் மருத்துவர்கள் சில நேரங்களில் மருந்துகளைப் பரிந்துரைக்கின்றனர்.

பெரும்பாலான அனுபவம் ஓலான்ஜபைன் என்ற மருந்தைப் பயன்படுத்துவதாகும். ஏனெனில் இது இளைஞர்களுக்கும் குறைந்த எடை உள்ளவர்களுக்கும் பாதுகாப்பானது. இது டயஸெபம் மற்றும் அதை ஒத்த மருந்துகளை விட மிகவும் பயனுள்ளதாக இருக்கலாம். மேலும், இது பழக்கத்தை உருவாக்கும் வாய்ப்பு குறைவு.

எடை அதிகரிப்பது என்பது மீட்சியைப் போன்றது அல்ல - ஆனால் எடை அதிகரிக்காமல் நீங்கள் மீட்சியடைய முடியாது. கடுமையாகப் பட்டினி கிடந்துள்ள மக்கள் பொதுவாகக் கவனம் செலுத்துவது அல்லது தெளிவாக சிந்திப்பது கடினம், குறிப்பாக அவர்களின் உணர்வுகளைப் பற்றி.

பசியின்மைக்குக் கட்டாயச் சிகிச்சை

இது அசாதாரணமானது. ஒருவர் கீழ்க்கண்ட அளவுக்கு உடல்நிலை சரியில்லாமல் இருந்தால் மட்டுமே இது செய்யப்படுகிறது:

• அவர்களால் தாங்களாகவே சரியான முடிவுகளை எடுக்க முடியாது
• அவர்கள் கடுமையான தீங்கிலிருந்து பாதுகாக்கப்பட வேண்டும்.

பசியின்மையில், உங்கள் எடை மிகவும் குறைவாக இருந்தால், உங்கள் உடல்நலம் (அல்லது உயிர்) ஆபத்தில் இருந்தால், எடை இழப்பால் உங்கள் சிந்தனை கடுமையாகப் பாதிக்கப்பட்டிருந்தால் இது நிகழலாம்.

பசியின்மைக்கான சிகிச்சை எவ்வளவு பயனுள்ளதாக இருக்கும்?

• பாதிக்கப்பட்டவர்களில் பாதிக்கும் மேற்பட்டவர்கள் குணமடைகிறார்கள், இருப்பினும் சராசரியாக அவர்கள் 6-7 ஆண்டுகள் நோய்வாய்ப்பட்டிருப்பார்கள்.
• 20 ஆண்டுகளுக்குக் கடுமையான பசியின்மையை உணர்ந்தபிறகும் முழு மீட்பு ஏற்படலாம்.
• மருத்துவமனையில் அனுமதிக்கப்பட்ட மிகவும் கடுமையாக நோய்வாய்ப்பட்ட நபர்களின் கடந்தகால ஆய்வுகள், இவர்களில் ஐந்தில் ஒருவர் இறக்கக்கூடும் என்று கூறுகின்றன. புதுப்பித்த பராமரிப்புடன், அந்த நபர் மருத்துவப் பராமரிப்புடன் தொடர்பில் இருந்தால், இறப்பு விகிதம் மிகவும் குறைவு.
• இதயமும் பிற உறுப்புகளும் சேதமடையாதவரை, பட்டினியால் ஏற்படும் பெரும்பாலான சிக்கல்கள் ஒருவர் போதுமான அளவு சாப்பிட்டவுடன் மெதுவாக மேம்படும் என்று தெரிகிறது.

புலிமியாவுக்குத் தொழில்முறை உதவி பெறுதல்

உங்கள் பொதுப் பின்பற்றுநர் உங்களை ஒரு சிறப்பு ஆலோசகர், மன நல மருத்துவர் அல்லது உளவியலாளரிடம் பரிந்துரைக்கலாம்.

நீங்கள் ஒரு தனியார் குணப்படுத்துபவர், தன்னுதவிக் குழு அல்லது மருத்துவமனையைத் தேர்வு செய்யலாம், ஆனால் என்ன நடக்கிறது என்பதை உங்கள் பொதுப் பின்பற்றுநரிடம் தெரிவிப்பது இன்னும் பாதுகாப்பானது.

நல்ல உடல் நலப் பரிசோதனை செய்து கொள்வது புத்திசாலித்தனம். உங்கள் உணவுக் குறைபாடு உடல் ரீதியான பிரச்சினைகளை ஏற்படுத்தியிருக்கலாம். அரிதாக, அடையாளம் காணப்படாத மருத்துவ நிலை உங்களுக்கு இருக்கலாம்.

உங்களுக்கு மிகவும் பயனுள்ள சிகிச்சைகள் எவை என்பது உங்கள் குறிப்பிட்ட அறிகுறிகள், உங்கள் வயது மற்றும் சூழ்நிலையைப் பொறுத்தது.

புலிமியாவுக்கான உளவியல் சிகிச்சை

புலிமியா நெர்வோசாவில் இரண்டு வகையான உளவியல் சிகிச்சைகள் பயனுள்ளதாக இருப்பதாகக் காட்டப்பட்டுள்ளது. இவை இரண்டும் சுமார் 20 வாரங்களுக்கு வாராந்திர அமர்வுகளில் வழங்கப்படுகின்றன.

அறிவாற்றல் பழகுமுறைச் சிகிச்சை (CBT)

இது வழக்கமாக ஒரு தனிப்பட்ட குணப்படுத்துபவருடன், ஒரு தன்னுதவிப் புத்தகத்துடன், குழு அமர்வுகளில் அல்லது ஒரு CD Rom உடன் செய்யப்படுகிறது.

CBT உங்கள் எண்ணங்களையும் உணர்வுகளையும் விரிவாகப் பார்க்க உதவுகிறது. உங்களுக்கு எது அதிக அளவு பசியைத் தூண்டுகிறது என்பதைக் கண்டறிய, உங்கள் உணவுப் பழக்கவழக்கங்களின் நாட்குறிப்பை நீங்கள் வைத்திருக்க வேண்டியிருக்கலாம்.

பின்னர் நீங்கள் இந்த சூழ்நிலைகள் அல்லது உணர்வுகளைப் பற்றி சிந்திக்கவும், அவற்றைக் கையாளவும் சிறந்த வழிகளைக் கண்டுபிடிக்கலாம். பசியின்மைக்கான சிகிச்சையைப் போலவே, குணப்படுத்துபவர் ஒரு நபராக உங்கள் சொந்த மதிப்பை மீண்டும் பெற உங்களுக்கு உதவுவார்.

ஒருவருக்கொருவர் பழகல் சிகிச்சை (IPT)

இது பொதுவாக ஒரு தனிப்பட்ட குணப்படுத்துபவரிடமும் செய்யப்படுகிறது, ஆனால் இது மற்றவர்களுடனான உங்கள் உறவுகளில் அதிகக் கவனம் செலுத்துகிறது. நீங்கள் ஒரு நண்பரை இழந்திருக்கலாம், ஓர் அன்புக்குரியவர் இறந்திருக்கலாம், அல்லது உங்கள் வாழ்க்கையில் இடம்பெயர்வது போன்ற ஒரு பெரிய மாற்றத்தைச் சந்தித்திருக்கலாம். உங்கள் உணர்வுத் தேவைகளை நிறைவு செய்வதற்குச் சாப்பிடுவதைவிடச் சிறந்த வழிகள் உள்ளன. ஆதரவான உறவுகளை மீண்டும் கட்டமைத்துக்கொள்வது உங்களுக்கு உதவலாம்.

புலிமியாவுக்கு உதவும் உணவு ஆலோசனை

இது வழக்கமான உணவுக்குத் திரும்ப உங்களை அனுமதிக்கிறது, இதனால் நீங்கள் பசி அல்லது வாந்தி இல்லாமல் நிலையான எடையைப் பராமரிக்க முடியும். ஓர் உணவியல் நிபுணர் ஆரோக்கியமான உணவுமுறை குறித்து உங்களுக்கு ஆலோசனை வழங்க முடியும்.

"ஒவ்வொரு BITE ஆக மேம்படுதல்" (குறிப்புகளைப் பார்க்கவும்) போன்ற ஒரு வழிகாட்டி உதவியாக இருக்கும்.

புலிமியாவுக்கு மருந்து வழங்கல்

நீங்கள் மனச்சோர்வடையாவிட்டாலும், ஃப்ளூக்ஸெடின் (புரோசாக்) போன்ற மனச்சோர்வுக்கு எதிரான மருந்துகளை அதிக மருந்தளவில் எடுத்துக்கொள்ளும்போது, அதிகமாகச் சாப்பிட வேண்டும் என்ற உந்துதல் குறையலாம்.

இது 2-3 வாரங்களில் உங்கள் அறிகுறிகளைக் குறைத்து, உளவியல் சிகிச்சைக்கு ஒரு "தொடக்கத்தை" வழங்கும். துரதிர்ஷ்டவசமாக, மற்ற வகையான உதவி இல்லாவிட்டால், சிறிது நேரத்திற்குப் பிறகு நன்மைகள் தேய்ந்துவிடும்.

புலிமியா சிகிச்சை எவ்வளவு பயனுள்ளதாக இருக்கும்?

• பாதிக்கப்பட்டவர்களில் பாதிப் பேர் குணமடைகிறார்கள், அவர்கள் அதிகமாகச் சாப்பிடுவதையும் வெளியேற்றுவதையும் குறைந்தது பாதியாகக் குறைக்கிறார்கள். இது முழுமையான சிகிச்சை அல்ல, ஆனால் உணவுப் பிரச்சினையின் குறுக்கீடு குறைவதோடு, உங்கள் வாழ்க்கையின் மீது சிறிதளவு கட்டுப்பாட்டை மீண்டும் பெற இது உங்களை அனுமதிக்கும்.
• உங்களுக்குப் போதைப்பொருள், மது அல்லது உங்களை நீங்களே காயப்படுத்திக் கொள்வது போன்ற பிரச்சனைகள் இருந்தால் விளைவு மோசமாக இருக்கும்.
• CBT மற்றும் IPT ஒரு வருடத்திற்கும் மேலாகத் திறம்படச் செயல்படுகின்றன; இருப்பினும், CBT சற்று முன்னதாகவே வேலை செய்யத் தொடங்குகிறது.
• மருந்து வழங்கல் மற்றும் உளவியல் சிகிச்சையின் கலவையானது தனியாகச் சிகிச்சையளிப்பதை விட மிகவும் பயனுள்ளதாக இருக்கும் என்பதற்குச் சில சான்றுகள் உள்ளன.
• மீட்பு பொதுவாகச் சில மாதங்கள் அல்லது பல ஆண்டுகளில் மெதுவாக நடைபெறும்.

கூடுதல் தகவல்கள்

இணைய வழி ஆலோசனை

B-eat(முன்பு The Eating Disorders Association என்று அழைக்கப்பட்டது): பெரியவர்களுக்கான உதவி இணைப்பு: 0845 634 1414; beat இளைஞர்களுக்கான (25 வயதுக்குட்பட்டவர்கள்) உதவி இணைப்பு: 0845 634 7650. B-eat என்பது உணவுக் குறைபாடுகள் அல்லது உணவுப் பிரச்சினைகளால் பாதிக்கப்பட்ட எவருக்கும் (குடும்பங்கள் மற்றும் நண்பர்கள் உட்பட) ஆதரவளிக்கும் UK-வின் முன்னணித் தொண்டு நிறுவனம்.

Bodywhys – The Eating Disorders Association of Ireland: உதவி இணைப்பு: 1890 200 444. மின்னஞ்சல்: info@bodywhys.ie

DWED(உணவுக் குறைபாடுகள் உள்ள நீரிழிவு நோயாளிகளுக்கான வலைத்தளம்)

Eating Disorder Hope: உணவுக் குறைபாடுகளால் பாதிக்கப்பட்டவர்கள், அவர்களின் சிகிச்சை வழங்குநர்கள் மற்றும் அன்புக்குரியவர்களுக்குத் தகவல், உணவுக் குறைபாட்டுச் சிகிச்சை விருப்பங்கள், மீட்புக் கருவிகள் மற்றும் வளங்களை வழங்கும் அமெரிக்க வலைத்தளம்.

Healthtalk.org: இதில் உணவுக் குறைபாடுகள் உள்ள இளைஞர்களை மையமாகக் கொண்ட ஒரு பிரிவு உள்ளது.

Mental Health Ireland
மின்னஞ்சல்:information@mentalhealthireland.ie. மன நலம் பாதிக்கப்பட்டவர்களுக்கு உதவி வழங்குகிறது மற்றும் நேர்விதமான மன நலத்தை மேம்படுத்துகிறது.

NHS 111: NHS விருப்பத்தேர்வுகள்: உங்களுக்கு விரைவாக மருத்துவ உதவி தேவைப்படும்போது 111 ஐ அழைக்கவும், ஆனால் அது 999 அவசரநிலை இல்லை. இது 24 மணி நேரமும், வருடத்தின் 365 நாட்களும் கிடைக்கும், தரைவழித் தொலைபேசி மற்றும் மொபைல் போன்களிலிருந்து அழைப்புகள் இலவசம்.

இணையத்தில் CBT வளங்கள்

• புலிமியாவை வெல்வது

மேலும் படிக்க

Breaking free from anorexia nervosa: a survival guide for families, friends and sufferers - எழுதியவர்: Janet Treasure (Psychology Press).

Anorexia nervosa and bulimia: how to help - எழுதியவர்: M. Duker & R. Slade (Open University Press).

Eating Disorders: A parents' guide - எழுதியவர்கள்: Rachel Bryant-Waugh and Brian Lask (Penguin Books).

Skills-based learning for caring for a loved one with an Eating Disorder: The New Maudsley Method. Janet Treasure, Grainne Smith மற்றும் Anna Crane.

Bulimia Nervosa and Binge eating: A guide to recovery - எழுதியவர்கள்: P. J. Cooper மற்றும் Christopher Fairbairn (Constable and Robinson).

Overcoming binge eating - எழுதியவர்: Christopher Fairburn (Guildford Press).

Getting better BITE by BITE: A survival kit for sufferers of bulimia nervosa and binge eating disorders - எழுதியவர்கள்: Janet Treasure மற்றும் Ulrike Schmidt (Hove Psychology Press).

Anorexia Nervosa and Related Eating Disorders (ANRED).

தன்னுதவிக் குறிப்புகள்:http://www.anred.com/slf_hlp.html

குறிப்புகள் மற்றும் பங்களிப்புகள்

• Agras, W. S.,Walsh, B.T., Fairburn, C. G., et al (2000) A multicentre comparison of cognitive-behavioural therapy and interpersonal psychotherapy for bulimia nervosa. Archives of General Psychiatry, 57, 459-466.
• Bacaltchuk J., Hay P., Trefiglio R. Antidepressants versus psychological treatments and their combination for bulimia nervosa (Cochrane Review). In: The Cochrane Library, Issue 2 2003. Oxford: Update Software.
• Bissada H. et al. Olanzapine in the treatment of low body weight and obsessive thinking in women with anorexia nervosa: a randomized, double-blind, placebo-controlled trial. Am J Psychiatry 2008 Jun 16.
• Eisler, I., Dare, C., Russell, G. F. M., et al (1997) Family and individual therapy in anorexia nervosa. Archives of General Psychiatry, 54, 1025-1030.
• Eisler, I., Dare, C., Hodes, M., et al (2000) Family therapy for anorexia nervosa in adolescents: the results of a controlled comparison of two family interventions.
  Journal of Child Psychology and Psychiatry, 41,727-736.
• Fairburn, C. G., Norman, P.A., Welch, S. L., et al (1995) A prospective study of outcome in bulimia nervosa and the long-term effects of three psychological treatments. Archives of General Psychiatry, 52, 304-312.
• Hay, P. J., & Bacaltchuk, J. (2001) Psychotherapy for bulimia nervosa and bingeing (Cochrane Review) In: The Cochrane Library, Issue 1.
• Lowe, B., Zipfel, S., Buchholz, C., Dupont, Y., Reas, D.L. & Herzog, W. (2001). Long-term outcome of anorexia nervosa in a prospective 21-year follow-up study. Psychological Medicine, 31, 881-890.
• Luck A.J., Morgan J.F., Reid F. et al. (2002) The SCOFF questionnaire and clinical interview for eating disorders in general practice: comparative study. BMJ, 325, 755-756.
• Milos, G., Spindler A., Schnyder, U. & Fairburn, C.G. (2005) Instability of eating disorder diagnoses: prospective study. British Journal of Psychiatry, 187, 573-578.
• NICE: Eating disorders (CG9) Eating Disorders: Core interventions in the treatment and management of anorexia nervosa, bulimia nervosa and related eating disorders (2004).
• Theander, S. (1985) Outcome and prognosis in anorexia nervosa and bulimia. Some results of previous investigations compared with those of a Swedish long-term study. Journal of Psychiatric Research, 19, 493-508.
• Senior R; Barnes J; Emberson J.R. and Golding J. on behalf of the ALSPAC Study Team (2005) Early experiences and their relationship to maternal eating disorder symptoms, both lifetime and during pregnancy. British Journal of Psychiatry, 187, 268-273.

வெளியிடப்பட்டது: நவ 2019

மதிப்பாய்வு செய்யவேண்டிய நாள்: நவ 2022

© உளவியலாளர்களுக்கான ராயல் கல்லூரி (Royal College of Psychiatrists)