စိတ်ထိခိုက်ဖွယ် ဖြစ်ရပ်တစ်ခုကို ရင်ဆိုင်ဖြေရှင်းခြင်း

Below is a Burmese translation of our information resource on coping after a traumatic event. You can also read our other translations.

ဤအချက်အလက်များသည် စိတ်ထိခိုက်ဖွယ် ဖြစ်ရပ်တစ်ခုကို ကြုံတွေ့ဖူးသူများ သို့မဟုတ် ထိုသို့ကြုံတွေ့ခဲ့ရသူတစ်ဦးဦးနှင့် သိရှိသူများအားလုံးအတွက် ဖြစ်သည်။

စိတ်ထိခိုက်ဖွယ် ဖြစ်ရပ်ဆိုသည်မှာ။

လူအများအပြားသည် ၎င်းတို့၏ ဘဝတစ်လျှောက် တစ်ချိန်ချိန်တွင် စိတ်ထိခိုက်ဖွယ် ဖြစ်ရပ်များကို ကြုံတွေ့ကြရမည်ဖြစ်သည်။ အင်္ဂလန်နိုင်ငံရှိ အရွယ်ရောက်ပြီးသူ သုံးပုံတစ်ပုံခန့်သည် ၎င်းတို့၏ ဘဝသက်တမ်းအတွင်း အနည်းဆုံး စိတ်ထိခိုက်ဖွယ် ဖြစ်ရပ်တစ်ခုကို ကြုံတွေ့ခဲ့ရကြောင်း အစီရင်ခံခဲ့သည်။

စိတ်ထိခိုက်ဖွယ် ဖြစ်ရပ်များတွင် အောက်ပါတို့ ပါဝင်နိုင်သည် -

• လူတစ်ဦးဦး သေဆုံးသည်ကို မြင်တွေ့ခြင်း သို့မဟုတ် သင်ကိုယ်တိုင်သေဆုံးတော့မည်ဟု တွေးမိခြင်း
• ပြင်းထန်စွာဒဏ်ရာရခြင်း သို့မဟုတ်
• လိင်ပိုင်းဆိုင်ရာ အကြမ်းဖက်မှု ကြုံတွေ့ရခြင်း။

လူများသည် အောက်ပါနည်းလမ်းများထဲမှ တစ်ခုခုဖြင့် စိတ်ထိခိုက်ဖွယ်ဖြစ်ရပ်များနှင့် ထိတွေ့နိုင်သည် -

• တိုက်ရိုက်- ၎င်းတို့ကိုယ်တိုင်တွင် ဖြစ်ပွားခြင်း
• သက်သေအဖြစ် မြင်တွေ့ခြင်း- အခြားသူတစ်ဦးဦး ဖြစ်ပျက်သည်ကို မြင်တွေ့ခြင်း
• လေ့လာသိရှိခြင်း- ၎င်းတို့နှင့် အလွန်နီးစပ်သူတစ်ဦးအပေါ်တွင် ဖြစ်ပျက်ခဲ့သည်ကို လေ့လာသိရှိခဲ့ရခြင်း
• ထပ်ခါတလဲလဲ ထိတွေ့ခြင်း– ၎င်းတို့ကိုယ်တိုင် စိတ်ထိခိုက်ဖွယ် ဖြစ်ရပ်များနှင့် ထပ်ခါတလဲလဲ ထိတွေ့မိခြင်း သို့မဟုတ် အခြားလူများကို ထပ်ခါတလဲလဲ ထိခိုက်စေသော စိတ်ထိခိုက်ဖွယ် ဖြစ်ရပ်များနှင့် ထိတွေ့မိခြင်း။ အလုပ်တွင် အီလက်ထရွန်နစ်မီဒီယာ၊ ရုပ်မြင်သံကြား၊ ရုပ်ရှင်များ သို့မဟုတ် ရုပ်ပုံများမှတစ်ဆင့် စိတ်ထိခိုက်ဖွယ် ဖြစ်ရပ်များနှင့် ထိတွေ့ရသူအချို့သည်လည်း စိတ်ကျန်းမာရေးဆိုင်ရာ အခက်အခဲများ ကြုံတွေ့ရနိုင်ကြောင်း ကျွန်ုပ်တို့သိပါသည်။

သာမန် စိတ်ထိခိုက်ဖွယ် ဖြစ်ရပ်များတွင် အောက်ပါတို့ ပါဝင်နိုင်သည် -

• ရက်စက်ကြမ်းကြုတ်မှုကြောင့် သေဆုံးမှုကို သက်သေအဖြစ် မြင်ခဲ့ခြင်း
• ပြင်းထန်သော မတော်တဆမှုများ၊ ဥပမာ - ကားတိုက်မှု
• ရုပ်ပိုင်းဆိုင်ရာ သို့မဟုတ် လိင်ပိုင်းဆိုင်ရာ စော်ကားတိုက်ခိုက်မှု
• ပြင်းထန်သော ကျန်းမာရေးပြဿနာများ သို့မဟုတ် အထူးကြပ်မတ် ကုသဆောင်တွင် တက်နေရခြင်း
• ခက်ခဲရှုပ်ထွေးသော မီးဖွား အတွေ့အကြုံများ
• အသက်အန္တရာယ် စိုးရိမ်ရသည့် နာမကျန်းမှုတစ်ခုရှိကြောင်း စစ်ဆေးတွေ့ရှိခြင်း
• စစ်ပွဲနှင့် ပဋိပက္ခ
• အကြမ်းဖက်တိုက်ခိုက်မှု
• သဘာဝ သို့မဟုတ် လူလုပ် ဘေးအန္တရာယ်များ၊ ဥပမာ - ဆူနာမီ သို့မဟုတ် မီးလောင်ကျွမ်းမှုများ

စိတ်ထိခိုက်မှု ခံစားရစေနိုင်သော်လည်း ဤနေရာတွင် ထည့်သွင်းမဖော်ပြထားသော ဖြစ်ရပ်များစွာရှိနေသည်ကို သတိရရန် အရေးကြီးပါသည်။ သင့်အတွေ့အကြုံကို ဤနေရာတွင် ထည့်သွင်းမဖော်ပြထားပါက သင်သည် အကူအညီနှင့် အထောက်အပံ့ကို မရယူသင့်ဟု မဆိုလိုပါ။

အချို့သောသူများမှာ ၎င်းတို့၏အလုပ်အကိုင်များကြောင့် အလုပ်ခွင်တွင်း စိတ်ထိခိုက်စရာ အဖြစ်အပျက်များကို ပိုမိုခံစားရနိုင်သည်။ ယင်းတို့တွင် အောက်ပါအလုပ်အကိုင်များ ပါဝင်နိုင်သည် -

• အရေးပေါ်ဝန်ဆောင်မှု ဝန်ထမ်းများ (ဥပမာ- ရဲအရာရှိများ၊ မီးသတ်သမား သို့မဟုတ် ဆေးမှူးများ)
• လူမှုဝန်ထမ်းများ
• အထူးကြပ်မတ်ကုသဆောင် ဝန်ထမ်းများ
• စစ်ဘက်ဆိုင်ရာ ဝန်ထမ်းများနှင့် အခြား စစ်ဖြစ်ပွားရာ နယ်မြေများတွင် လုပ်ကိုင်နေသူများ

စိတ်ထိခိုက်ဖွယ် ဖြစ်ရပ်တစ်ခုအပြီး ကျွန်ုပ်၏ ခံစားရပုံ။

စိတ်ထိခိုက်ဖွယ် ဖြစ်ရပ်တစ်ခုပြီးနောက် လူများသည် အောက်ပါအခြင်းအရာအချို့ကို တွေ့ကြုံခံစားရလေ့ရှိသည် -

• အမှတ်ရစရာများ၊ အိပ်မက်များနှင့် ပြန်မြင်ယောင်မှုများ- သင့်တွင် ဖြစ်ရပ်နှင့်ပတ်သက်သော စိတ်ဆင်းရဲဖွယ် အမှတ်ရစရာများ၊ အိပ်မက်များ သို့မဟုတ် အိပ်မက်ဆိုးများ ရှိနေနိုင်သည်။ အဆိုပါဖြစ်ရပ် ထပ်မံဖြစ်ပျက်နေသလိုလည်း သင် တွေ့ကြုံရနိုင်သည် (၎င်းကို ပြန်မြင်ယောင်ခြင်းဟု ခေါ်သည်)။
• ဖြစ်ရပ်ကို ပြန်သတိရချိန်၌ စိတ်မကောင်းဖြစ်ခြင်း- ဖြစ်ရပ် ဖြစ်ပွားခဲ့သည့် နေရာအနီးတွင် သို့မဟုတ် ဖြစ်ရပ်ကို သတိရစေသည့်ပတ်ဝန်းကျင်တစ်ခုတွင် သင်ရောက်နေချိန်၌ အထူး စိတ်ထိခိုက်နိုင်သည်။
• ခံစားချက်များနှင့် အခြေအနေများကို ရှောင်ကြဉ်ခြင်း -အဖြစ်အပျက်နှင့် ဆက်စပ်နေသော အမှတ်ရစရာများ၊ အတွေးများ၊ ခံစားချက်များ၊ အခြင်းအရာများ၊ လူများနှင့် နေရာများကို သင် ရှောင်ရှားနေမိနိုင်သည်။
• မှတ်ဉာဏ်ပျောက်ဆုံးခြင်း– ဖြစ်ရပ်၏ တစ်စိတ်တစ်ပိုင်းကို သင်မမှတ်မိဘဲ ဖြစ်နေနိုင်ပါသည်။
• ခက်ခဲသောခံစားချက်များ– ၎င်းတို့တွင် အောက်ပါတို့ ပါဝင်နိုင်သည် -
  • မိမိကိုယ်ကို၊ အခြားသူများ သို့မဟုတ် လောကကြီးအပေါ် အဆိုးမြင်ခံစားရခြင်း
  • ဖြစ်ပျက်ခဲ့သည့်အရာအတွက် မိမိကိုယ်ကို သို့မဟုတ် အခြားသူများကို အပြစ်တင်ခြင်း
  • ကြောက်ရွံ့မှု၊ ထိတ်လန့်မှု၊ ဒေါသ၊ အပြစ်ရှိသလို ခံစားရမှု သို့မဟုတ် ရှက်ရွံ့မှု စသည့် အပျက်သဘောဆောင်သည့် စိတ်ခံစားမှုများ
  • ပျော်ရွှင်မှု၊ ကျေနပ်မှု သို့မဟုတ် သူတစ်ပါးအပေါ် ချစ်ခြင်းမေတ္တာကို ခံစားနိုင်စွမ်း မရှိခြင်း
• ပြုမူလုပ်ဆောင်ပုံ အပြောင်းအလဲများ– ၎င်းတို့တွင် အောက်ပါတို့ ပါဝင်နိုင်သည် -
  • သင်နှစ်သက်ခဲ့ဖူးသောအရာများကို မလုပ်တော့ခြင်း သို့မဟုတ် စိတ်မဝင်စားတော့ခြင်း
  • အခြားလူများနှင့် မဆက်စပ်သလို ခံစားရခြင်း
  • မဆင်မခြင် သို့မဟုတ် မိမိကိုယ်မိမိ ပျက်စီးစေသော နည်းလမ်းများဖြင့် ပြုမူခြင်း
  • လူများ သို့မဟုတ် အရာဝထ္ထုများကို ဒေါသထွက်ပြီး ရန်လိုနေခြင်း
  • အထူး သတိကြီးနေခြင်း သို့မဟုတ် 'သတိဖြင့် နေခြင်း'

ဤသည်တို့သည် စိတ်ဒဏ်ရာအလွန် စိတ်ဖိစီးမှုရောဂါ (PTSD)ရှိသူများ၌ ဖြစ်ပေါ်လာနိုင်သည်နှင့် တူညီသောလက္ခဏာများ ဖြစ်ကြသည်။ သို့သော်လည်း စိတ်ထိခိုက်ဖွယ် ဖြစ်ရပ်ကို တွေ့ကြုံခံစားရသူတိုင်း PTSD ဖြစ်လာကြမည် မဟုတ်ပါ။ အမှန်တကယ်တွင် စိတ်ထိခိုက်ဖွယ် ဖြစ်ရပ်ကို တွေ့ကြုံခံစားရသူအများစုသည် အချိန်ကြာလာသည်နှင့်အမျှ ဆိုးကျိုးများ ပျောက်ကွယ်သွားသည်ကို တွေ့လာရသည်။

ဤခံစားချက်များ ပျောက်ရန် ကြာမြင့်မည့် အချိန်ကာလ။

စိတ်ထိခိုက်ဖွယ်ဖြစ်ရပ်၏ အကျိုးဆက်များ လျော့ပါးသက်သာရန် ရက်အနည်းငယ်၊ သီတင်းပတ်များစွာ သို့မဟုတ် လများစွာပင် ကြာနိုင်သည်။

အကယ်၍ တစ်စုံတစ်ယောက်သည် တစ်လကြာပြီးနောက် စိတ်ဆင်းရဲမှုအချို့ကို ကြုံတွေ့နေရဆဲဖြစ်သော်လည်း ဤခံစားချက်များသည် တဖြည်းဖြည်း သက်သာလာနေပါက ၎င်းတို့သည် ပိုမိုကောင်းမွန်လာနိုင်ခြေရှိပြီး ကုသရန်မလိုအပ်ပေ။

သို့သော် တစ်လကြာပြီးနောက် လုံးဝမတိုးတက်လာဘဲ စိတ်ဒုက္ခကို သိသိသာသာကြုံတွေ့နေရပါက သို့မဟုတ် သုံးလကျော်ပြီးနောက် ဆက်လက်ခံစားနေရသေးပါက ၎င်းတို့သည်PTSDဖြစ်ပေါ်လာသည့် လက္ခဏာတစ်ရပ်ဖြစ်နိုင်သည်။ 

စိတ်ထိခိုက်ဖွယ် ဖြစ်ရပ်တစ်ခု ကြုံဖူးခဲ့ပါက လုပ်ဆောင်သင့်သည်များ။

အောက်ပါတို့သည် စိတ်ထိခိုက်ဖွယ် ဖြစ်ရပ်တစ်ခုကို တွေ့ကြုံပြီးနောက် သင်ကြိုးစားလုပ်ဆောင်သင့်သည့် အရာအချို့ဖြစ်သည် -

သင့်ကိုယ်သင် အချိန်ပေးပါ

စိတ်ထိခိုက်ဖွယ်ဖြစ်ရပ်၏ အကျိုးဆက်များ လျော့ပါးသက်သာရန် အချိန်ယူရနိုင်ပါသည်။ ဖြစ်ပျက်ခဲ့သည်များကို လက်ခံရန် သို့မဟုတ် ၎င်းစိတ်ဖြင့်ရှင်သန်နေထိုင်ဖို့ သင်ယူရန် အချိန်အနည်းငယ် ကြာနိုင်သည်။ တစ်စုံတစ်ဦး သေဆုံးသွားပါကသို့မဟုတ် သင့်အတွက် အရေးပါသည့်အရာတစ်ခု ဆုံးရှုံးသွားပါက ဝမ်းနည်းပူဆွေးရန် အချိန်ပေးရနိုင်သည်။ စိတ်ထဲတွင် ချက်ချင်းပြန်ကောင်းလာရန် သင့်ကိုယ်သင် ဖိအားမပေးမိစေဖို့ ကြိုးစားပါ။

ဖြစ်ရပ်အကြောင်း ပြောဆိုပါ

စိတ်ထိခိုက်ဖွယ် ဖြစ်ရပ်တစ်ခုအပြီး ယင်းဖြစ်ရပ်ကို သတိရစေမည့် အရာများကို ရှောင်ရှားလိုခြင်းနှင့် ဖြစ်ပျက်ခဲ့သည့်အရာအကြောင်း ပြောဆိုခြင်းတို့ကိုပင် သင် ရှောင်ရှားရန် ဆန္ဒရှိနိုင်ပါသည်။ သို့သော် ဖြစ်ရပ်အကြောင်းနှင့် သင့်ခံစားချက်များကို ပြောဆိုခြင်းက ပို၍ခံနိုင်ရည်ရှိစေရန် သင့်အား ကူညီပေးနိုင်ကြောင်း သုတေသနပြုချက်များအရ သိရသည်။ အမှတ်ရစရာများနှင့် ခံစားချက်များကို ရှောင်ကြဉ်ခြင်းသည် လူကို စိတ်ခံစားချက် ပိုမိုဆိုးရွားစေသည်ဟု ပြသထားသည်။

သင်ကဲ့သို့ အလားတူတွေ့ကြုံဖူးသော အခြားသူများနှင့် စကားပြောပါ

သင်ကဲ့သို့ စိတ်ထိခိုက်စရာ အဖြစ်အပျက်ကို ကြုံတွေ့ခဲ့ရသော အခြားသူများ သို့မဟုတ် အလားတူ တွေ့ကြုံဖူးသူများနှင့် စကားပြောဆိုခြင်းက အကူအညီဖြစ်နိုင်ခြေရှိပါသည်။ သို့သော် တူညီသောဖြစ်ရပ်များတွင် လူအများသည် မတူညီသောနည်းလမ်းများဖြင့် ပြန်လည်နာလန်ထူလာတတ်၊ တုံ့ပြန်တတ်ကြသည်။ သင်ကိုယ်တိုင် ပြန်လည်နာလန်ထူလာခဲ့ပုံကို အခြားသူတစ်ဦးဦးနှင့် မနှိုင်းယှဉ်မိပါစေနှင့်။ အကယ်၍ သင်သည် ဖြစ်ရပ်ဒဏ်ခံခဲ့ရသော အခြားသူများကို ကူညီထောက်ပံ့နိုင်သည်ဟု ခံစားရပါက ၎င်းကလည်း အထောက်အကူဖြစ်နိုင်သည်။

အကူအညီတောင်းပါ

သင်ယုံကြည်ရသော သူငယ်ချင်းများ၊ မိသားစု သို့မဟုတ် အခြားသူများထံမှ ပံ့ပိုးမှုရယူခြင်းသည် စိတ်ထိခိုက်ဖွယ် ဖြစ်ရပ်တစ်ခုပြီးနောက် ပိုမိုကောင်းမွန်စွာ ရင်ဆိုင်ဖြေရှင်းနိုင်စေရန် သင့်အား ကူညီပေးနိုင်ပါသည်။ စိတ်ပိုင်းဆိုင်ရာ ပံ့ပိုးကူညီမှုများ ပေးသည့်အပြင် ၎င်းတို့သည် သင့်အား လက်တွေ့ကျသော အလုပ်များလုပ်ရန် ကူညီပေးနိုင်သည် သို့မဟုတ် 'ပုံမှန်' အလုပ်များလုပ်၍ သင်နှင့်အတူ အချိန်ကုန်ဆုံးစေနိုင်ပါမည်။

တစ်ယောက်တည်း အချိန်များစွာ ကုန်ဆုံးစေခြင်းကို ရှောင်ကြဉ်ပါ

အခြားလူများအနီးတွင် နေခြင်းသည် စိတ်ထိခိုက်ဖွယ် ဖြစ်ရပ်တစ်ခုပြီးနောက် သင့်အဖို့ စိတ်ကျန်းမာရေးညံ့မှု ခံစားရနိုင်ခြေ နည်းပါးစေကြောင်း ပြသထားသည်။ သင်တစ်ဦးတည်း နေထိုင်နေပါက စိတ်ထိခိုက်ဖွယ် ဖြစ်ရပ်တစ်ခုပြီးနောက်တွင် မိသားစု သို့မဟုတ် ရင်းနှီးသော သူငယ်ချင်းများထံ ပြောင်းရွှေ့နေထိုင်ရန် လက်တွေ့မဖြစ်နိုင်လျှင်ပင် သုံးသပ်ကြည့်သင့်ပါသည်။ ထိုသို့မဖြစ်နိုင်ပါက သင့်အနီးအနားရှိသူများကို အချိန်ပိုပေးကြည့်ပါ သို့မဟုတ် ဖုန်းဖြင့်ဖြစ်စေ ဗီဒီယိုခေါ်ဆိုမှုများဖြင့်ဖြစ်စေ ၎င်းတို့နှင့် အဆက်အသွယ်လုပ်နေပါ။

သင်၏လုပ်ရိုးလုပ်စဉ်အတိုင်း လိုက်နာပါ

ခက်ခဲသည်ဟု ခံစားရလျှင်ပင် စိတ်ထိခိုက်စရာ အဖြစ်အပျက်များ မတိုင်မီ သင်လုပ်ခဲ့သည့် လုပ်ရိုးလုပ်စဉ်အတိုင်း ဆက်လုပ်ပါ။ ဖြစ်ရပ်အပြီးတွင် သင်၏အစားအသောက်နှင့် လေ့ကျင့်ခန်း အလေ့အထများ ပြောင်းလဲလာကာ အိပ်ပျော်ရန် ခက်ခဲကြောင်း တွေ့ရှိနိုင်သည်။ အစားမှန်မှန်စားပြီး ကိုယ်လက်လှုပ်ရှားမှု မှန်မှန်လုပ်ရန် ကြိုးစားကာ အိပ်ရေးဝဝ အိပ်ပါ။ နောက်ထပ် အချက်အလက်များရရှိရန် ကောင်းမွန်စွာအိပ်စက်ခြင်းအကြောင်း ကျွန်ုပ်တို့၏အရင်းအမြစ်ကို ကြည့်ပါ။

ကျွမ်းကျင်သူထံမှ အကူအညီရယူရန် စဉ်းစားပါ

အချို့လူများသည် အခက်အခဲကြုံနေရပါက ၎င်းတို့၏ မိသားစုဆရာဝန်နှင့် စကားပြောခြင်းက အထောက်အကူဖြစ်နိုင်သည်။ သင်ခံစားနေရသော လက္ခဏာများသည် အလွန်ပြင်းထန်သောကြောင့် သင့်မိသားစုဆရာဝန်က အကြံပြုထားခြင်းမရှိပါက ပထမလတွင် ကျွမ်းကျင်အဆင့် စိတ်ကျန်းမာရေးဆိုင်ရာ ပံ့ပိုးကူညီမှုရယူခြင်းက ယေဘုယျအားဖြင့် အထောက်အကူမဖြစ်ပါ။

သင်ခံစားနေရပုံကို သတိပြုပါ

စိတ်ထိခိုက်စရာဖြစ်ရပ်တစ်ခုပြီးနောက် ပထမလအနည်းငယ်တွင် သင်သည် အချိန်နှင့်အမျှ မိမိမည်သို့ခံစားရသည်ကို အာရုံစိုက်ကြည့်သင့်ပါသည်။ ပိုကောင်းလာသလို မခံစားရပါက သို့မဟုတ် ပိုဆိုးလာသည်ဆိုပါက သင့်အထွေထွေ‌ရောဂါကုဆရာဝန်နှင့် စကားပြောသင့်ပါသည်။

သင့်အလုပ်ရှင်ထံမှ အကူအညီတောင်းပါ

သင့်အလုပ်၏ တစ်စိတ်တစ်ပိုင်းအနေဖြင့် စိတ်ထိခိုက်ဖွယ် ဖြစ်ရပ်ကို တွေ့ကြုံခံစားရခြင်းဖြစ်ပါက လုပ်ငန်းခွင်တွင်း သင့်အား ကူညီပေးရန် ပံ့ပိုးမှုစနစ်များ ရှိနေနိုင်သည်။ အလုပ်ပြင်ပတွင် စိတ်ထိခိုက်ဖွယ် ဖြစ်ရပ်ကို ကြုံတွေ့ရပါက သင့် အလုပ်ရှင်အား သင် အသိပေးသင့်ပါသည်၊ သို့မှသာ ၎င်းတို့က သင့်အား ကူညီပံ့ပိုးပေးနိုင်ပါသည်။ ထို့အတွက် ဖြစ်ပျက်ခဲ့သည့်အရာကို ပြောပြခြင်းကဲ့သို့ ရိုးရိုးရှင်းရှင်း လုပ်‌ဆောင်နိုင်ပြီး သင် မည်သို့ခံစားနေရကြောင်း ၎င်းအနေဖြင့် သိနိုင်ပါမည်။ သင့်အနေဖြင့် နောက်ထပ်စိတ်ဒဏ်ရာ သို့မဟုတ် ပြင်းထန်သော စိတ်ဖိစီးမှုများနှင့် မထိတွေ့မိရန် စီမံခြင်း သို့မဟုတ် သင်၏အလုပ်ချိန်ကို ချိန်ညှိခြင်းကဲ့သို့သော အလုပ်လုပ်ပုံကို ပြုပြင်ပြောင်းလဲပေးရန် ၎င်းတို့အား တောင်းဆိုနိုင်သည်။ အလုပ်ရှင်များအတွက် ကဏ္ဍကို ဤအရင်းအမြစ်တွင် ဆက်လက်ဖတ်ရှုပါ။

ဂရုစိုက်ပါ

စိတ်ထိခိုက်ဖွယ် ဖြစ်ရပ်တစ်ခုပြီးနောက် လူအများသည် မတော်တဆမှုဖြစ်နိုင်ခြေ ပိုများပါသည်။ အိမ်အနီးဝန်းကျင်တွင် ရှိနေချိန်နှင့် ကားမောင်းနေချိန်တွင် သတိထားပါ။ စိတ်ထိခိုက်ဖွယ်ဖြစ်ရပ်တစ်ခုပြီးနောက် ရင်ဆိုင်ဖြေရှင်းရန် နည်းလမ်းတစ်ခုအဖြစ် အရက် သို့မဟုတ် တရားမ၀င် ဆေးဝါးများကို အသုံးမပြုမိစေရန် ကြိုးစားပါ။ ၎င်းတို့သည် သင့်အတွက် ရေတို၌ ပိုမိုကောင်းမွန်စွာ ခံစားရစေနိုင်သော်လည်း ရေရှည်တွင် ပြန်လည်ကောင်းမွန်လာစေရန် ကူညီပေးမည်မဟုတ်ပေ။

ဖြစ်ရပ်နှင့် ပတ်သက်သည့် မီဒီယာတင်ဆက်မှုများကို အလွန်အကျွံကြည့်ရှုခြင်းမှ ရှောင်ကြဉ်ပါ

စိတ်ထိခိုက်ဖွယ်ဖြစ်ရပ်တစ်ခုကို တွေ့ကြုံပြီးနောက် ၎င်းနှင့်ပတ်သက်သည့် အကြောင်းအရာများစွာကို လူမှုမီဒီယာ သို့မဟုတ် သတင်းများတွင် ကြည့်ရှုရန် သို့မဟုတ် ဖတ်ရှုရန် ဆွဲဆောင်မှုခံရနိုင်သည်။ ၎င်းသည် အထူးသဖြင့် အကြမ်းဖက်တိုက်ခိုက်မှုများ သို့မဟုတ် သဘာဝဘေးအန္တရာယ်များကဲ့သို့သော လူထုအာရုံစိုက်မှုများသည့် ဖြစ်ရပ်များတွင် မှန်ကန်သည်။ သို့ရာတွင် ဖြစ်ရပ်နှင့် ပတ်သက်သည့် မီဒီယာတင်ဆက်မှုများစွာကို ကြည့်ရှုခြင်း၊ နားထောင်ခြင်း သို့မဟုတ် ဖတ်ရှုခြင်းက သင့်အား စိတ်သောကရောက်စေပါက ၎င်းကို ရှောင်ကြဉ်ခြင်းသည် အကောင်းဆုံးဖြစ်သည်။ 

ကျွမ်းကျင်သူ၏ အကူအညီကို ရယူသင့်သည့်အချိန်။

လူတိုင်းသည် စိတ်မချမ်းမြေ့ဖွယ် အတွေ့အကြုံများကို ကိုင်တွယ်ဖြေရှင်းပုံခြင်း မတူကြပါ။ လူတော်တော်များများသည် စိတ်မချမ်းမြေ့ဖွယ် ဖြစ်ရပ်၏ အကျိုးဆက်များကို မိသားစု၊ သူငယ်ချင်းနှင့် ၎င်းတို့၏လုပ်ငန်းခွင်မှ အကူအညီဖြင့် ပြန်လည်ကုစားနိုင်လိမ့်မည်။

စိတ်မချမ်းမြေ့ဖွယ် ဖြစ်ရပ်တစ်ခု၏ အကျိုးဆက်များ လျော့ပါးပြေပျောက်ပြီးသည့်အချိန်တွင်ပင် ထိုကိစ္စကို မမေ့နိုင်ဘဲ ရှိနေနိုင်သည်။ ၎င်းနှင့်ပတ်သက်ပြီး အပျက်သဘောဆောင်သည့်ခံစားချက်များ သင်ခံစားရနေနိုင်သည် သို့မဟုတ် စဉ်းစားမိသည့်အခါတိုင်း စိတ်အနှောင့်အယှက်ဖြစ်နိုင်သည်။ သို့သော် ဤခံစားချက်များသည် သင့်ဘဝကို မပျော်ရွှင်စေခြင်း သို့မဟုတ် လွှမ်းမိုးနေခြင်းမျိုး မဖြစ်သင့်ပါ။

အောက်ပါအခြေအနေတို့တွင် သင့်အထွေထွေရောဂါကုဆရာဝန်ထံ အကူအညီတောင်းသင့်သည်-

• သင့်ရောဂါလက္ခဏာများ အလွန်ဆိုးနေပြီး
• လျော့ပါးသက်သာလာပုံမရသည့်အခါ

သင့်ရောဂါလက္ခဏာများ အလွန်ဆိုးနေပြီး တစ်လအကြာတွင်သင့်ဘဝအပေါ် သိသိသာသာ သက်ရောက်မှုရှိလာပါက သင့်ဆရာဝန်နှင့် ဆွေးနွေးသင့်သည်။

သင့်ရောဂါလက္ခဏာများမှာ သိပ်မဆိုးသော်လည်း ဖြစ်နေသည်မှာ သုံးလကျော်ကြာနေပါက သင့်ဆရာဝန်နှင့် ဆွေးနွေးသင့်သည်။

PTSD ရရင် ဘာဖြစ်မလဲ။

စိတထိခိုက်ဖွယ် ဖြစ်ရပ်တစ်ခုကို တွေ့ကြုံခံစားရသော လျစ်လျူရှု၍မရသည့် လူနည်းစုအရေအတွက်တစ်ခုသည်PTSD အဆင့်အထိ ဆက်လက်ဖြစ်ပွားနိုင်သည်။ ၎င်းသည် ပြင်းထန်သော စိတ်ကျန်းမာရေး အခြေအနေတစ်ခုဖြစ်သည်။

PTSD ရှိသူများသည် ပို၍ပြင်းထန်သော ကနဦးအခက်အခဲများ ရှိနိုင်ပြီး ၎င်းတို့၏ စိတ်သောကရောက်စေသည့် အတွေးများနှင့် ခံစားချက်များသည် အလိုအလျောက် ပျောက်ကွယ်သွားမည်မဟုတ်ပေ။ ၎င်းတို့သည် လူတစ်ဦးအဖို့ မိမိ၏ဘဝတွင် ယခင်အတိုင်းနေထိုင်ရန် ခက်ခဲစေနိုင်သည်။

ကျွန်ုပ်တို့၏ PTSD အရင်းအမြစ်တွင် PTSD ရောဂါလက္ခဏာများ၊ ဖြစ်ရသည့် အကြောင်းရင်းများနှင့် ကုသမှုများကို ပိုမိုတွေ့ရှိနိုင်ပါသည်။

ရရှိနိုင်သော ကျွမ်းကျင်သူအကူအညီများ။

အကယ်၍ သင်သည် စိတ်ထိခိုက်ဖွယ် ဖြစ်ရပ်တစ်ခုကို တွေ့ကြုံခဲ့ရပြီး အခက်အခဲများ ဆက်လက်ကြုံတွေ့နေရပါက သင့်ဆရာဝန်သည် သင့်အား စိတ်ဒဏ်ရာ ကုစားရာတွင် အထူးပြုကူညီပေးသည့် ကျွမ်းကျင်သူတစ်ဦးထံ လွှဲပေးနိုင်ပါသည်။

PTSD ကို ကုသရာတွင် အထောက်အကူအဖြစ် မတူညီသောကုသမှုများစွာရှိပါသည်။ ၎င်းတို့တွင် စိတ်ပိုင်းဆိုင်ရာကုထုံး၊ စိတ်ဒဏ်ရာကို အဓိကထားသော သိမြင်နားလည်မှုအခြေပြု အပြုအမူ(TF-CBT) နှင့် မျက်လုံးလှုပ်ရှားတုံ့ပြန်မှုလျှော့ချခြင်းနှင့် ပြန်လည်စီမံခြင်း (EMDR) တို့ ပါဝင်သည်။ အခြားကုသနည်းများ မထိရောက်ကြောင်း တွေ့ရှိပါက သင့်အား စိတ်ကျရောဂါကုဆေးများလည်း ပေးနိုင်သည်။

ကျွန်ုပ်တို့၏ PTSD အရင်းအမြစ်တွင် ဤကုသမှုများအားလုံးအကြောင်း ပိုမိုတွေ့ရှိနိုင်ပါသည်။

ကျွန်ုပ်၏ဆရာဝန်က ကျွန်ုပ်အတွက် ကူညီဖြေရှင်းပေးရန် ဆေးဝါး ညွှန်းပေးနိုင်ပါသလား။

ဆေးဝါးများသည် စိတ်ဒဏ်ရာရပြီးနောက် တစ်ခါတစ်ရံ အထောက်အကူဖြစ်နိုင်သော်လည်း သင့်အခြေအနေကို စစ်ဆေးရန်အတွက် ဆရာဝန်နှင့် ပုံမှန်ပြသရန် အရေးကြီးပါသည်။

အိပ်ဆေးများ

စိတ်ထိခိုက်ဖွယ် ဖြစ်ရပ်တစ်ခုအပြီးတွင် သင်အိပ်ပျော်ရန် ခက်ခဲနေပါက သင့်ဆရာဝန်က သင့်အား အိပ်ဆေးပေးနိုင်သည်။ ထိုဆေးများကို အချိန်တိုအတွင်းသာ ပေးမည်ဖြစ်ပြီး ၎င်းတို့သည် ရာသက်ပန်ဖြေရှင်းချက်တစ်ခု မဟုတ်ပေ။

စိတ်ထိခိုက်ဖွယ် ဖြစ်ရပ်တစ်ခုဖြစ်ပြီးနောက် သင်သည် PTSD သို့မဟုတ်စိတ်ဓာတ်ကျခြင်းကဲ့သို့သော အခြားအခြေအနေတစ်ခုဖြစ်လာပါက သင့်အားစိတ်ကျရောဂါကုဆေးများကဲ့သို့သော အခြားဆေးဝါးများကို ပေးနိုင်ပါသည်။ ကျွန်ုပ်တို့၏ PTSD အရင်းအမြစ်တွင် PTSD ကိုကုသရန် အသုံးပြုသော ဆေးဝါးများနှင့် ကုထုံးများအကြောင်း ပိုမိုတွေ့ရှိနိုင်ပါသည်။

စိတ်ထိခိုက်ဖွယ် ဖြစ်ရပ်တစ်ခု ကြုံတွေ့ခဲ့ရသူတစ်ဦးကို ကူညီနိုင်မည့်နည်းလမ်း။

အောက်ဖော်ပြပါတို့သည် စိတ်ထိခိုက်ဖွယ်တစ်စုံတစ်ရာကို ကြုံတွေ့ခဲ့ရသူတစ်ဦးအား ကူညီပေးနိုင်သည်-

• အတူရှိပေးခြင်း- ၎င်းတို့နှင့်အတူရှိရန် အချိန်ပေးမည်ဟု ကမ်းလှမ်းပါ။ ၎င်းတို့က သင်နှင့် မတွေ့ဆုံလိုပါက ၎င်းတို့စိတ်ပြောင်းသည့်အခါ ရှိနေပေးဦးမည်ဖြစ်ကြောင်း အသိပေးထားနိုင်သည်။ ၎င်းတို့ကို ပူညံပူညံလုပ်ခြင်းအား ရှောင်ကြဉ်သင့်သော်လည်း သင့်အကူအညီကို လက်ခံရန် တိုက်တွန်းခြင်းက အကူအညီဖြစ်စေနိုင်သည်။
• နားထောင်ခြင်း– ၎င်းတို့က မျှဝေပြောပြခြင်းမပြုလိုလျှင် ဖိအားပေးရန် မကြိုးစားပါနှင့်။ ၎င်းတို့စကားပြောလိုပါက ကြားဖြတ်ပြောခြင်း သို့မဟုတ် သင့်ကိုယ်ပိုင်အတွေ့အကြုံများ မျှဝေခြင်း မပြုဘဲ နားထောင်ပါ။
• ယေဘုယျမေးခွန်းများမေးပါ- သင်မေးခွန်းမေးပါက ယေဘုယျဆန်ပြီး ဝေဖန်သုံးသပ်ရာမရောက်အောင် ကြိုးစားပါ။ ဥပမာအားဖြင့် 'ဒီအကြောင်းကို တခြားတစ်ယောက်ယောက်နဲ့ ပြောပြီးပြီလား' သို့မဟုတ် 'နောက်ထပ် အကူအညီတွေ ကူရှာပေးလို့ရမလား’ ဟု မေးသင့်ပါသည်။
• လက်တွေ့ကျသောအကူအညီ ပေးပါ- ၎င်းတို့သည် မိမိကိုယ်ကို ပြုစုစောင့်ရှောက်ရန်နှင့် နေ့စဉ်ပုံမှန်လုပ်နေကျအတိုင်း လုပ်ရန် အခက်အခဲရှိကြောင်း တွေ့ရှိရနိုင်သည်။ သန့်ရှင်းရေးလုပ်ခြင်း သို့မဟုတ် အစားအသောက်ပြင်ဆင်ခြင်းကဲ့သို့သော အကူအညီအချို့ပေးပါ။

အောက်ပါတို့ကို ရှောင်ကြဉ်သင့်သည်-

• ၎င်းတို့ မည်သို့ခံစားရသည်ကို သင်သိကြောင်းပြောပြခြင်း– အလားတူ ဖြစ်ရပ်မျိုးကို သင်ကြုံခဲ့ဖူးလျှင်ပင် လူအများကြားတွင် အခြေအနေများကို တွေ့ကြုံရင်ဆိုင်ပုံချင်း ကွဲပြားကြသည်။ နှိုင်းယှဉ်ပြောဆိုခြင်းသည် ကူညီရာမရောက်နိုင်ပါ။
• ၎င်းတို့အသက်ရှင်နေသည်မှာ ကံကောင်းကြောင်း ပြောခြင်း- စိတ်ထိခိုက်ဖွယ် ဖြစ်ရပ်များ ကြုံဖူးသူများသည် ကံကောင်းသည်ဟု ခံစားရမည်မဟုတ်ပါ။ အခြားသူများသေဆုံးသွားပါက ၎င်းတို့ရှင်သန်နေရခြင်းအတွက် အပြစ်ရှိသည်ဟု ခံစားရလေ့ရှိသည်။
• ၎င်းတို့၏ အတွေ့အကြုံကို ချိုးနှိမ်ခြင်း– စိတ်သက်သာရာရအောင် ပြုလုပ်ခြင်းဖြစ်စေကာမူ ဤမျှထက်ပိုဆိုးသွားနိုင်ခြေရှိခဲ့သည်ဟု ပြောဆိုခြင်းမှ ရှောင်ကြဉ်ပါ။ ထိုသို့ပြောခြင်းသည် လူအများကို ၎င်းတို့၏ အတွေ့အကြုံများက မတရားဟု ခံစားရစေနိုင်သည်။
• အထောက်အကူမပြုသော အကြံပြုချက်များ ပေးအပ်ခြင်း- ယခင်က သင့်အတွက် အကျိုးရှိခဲ့သည့်အရာများဖြစ်လျှင်ပင် ၎င်းတို့ကို အကြံပြုခြင်းမှ ရှောင်ပါ။ လူတို့သည် တစ်ဦးနှင့်တစ်ဦး အလွန်ကွဲပြားကြပြီး ၎င်းတို့သည် သင်အကြံပြုသည့်အရာကို ကြိုးစားဖူးပြီးသား ဖြစ်နိုင်သည်။

ကူညီပံ့ပိုးနိုင်စွမ်းရှိသော အလုပ်ရှင်တစ်ဦး ဖြစ်နိုင်မည့်နည်းလမ်း။

တစ်ခါတရံတွင် စိတ်ထိခိုက်ဖွယ် ဖြစ်ရပ်များသည် လူအများ အလုပ်ခွင်၌ ရှိနေစဉ် ဖြစ်ပွားသည်။ ယခင်ကဖော်ပြခဲ့သည့်အတိုင်း အချို့သောအလုပ်များသည် လူများအဖို့ စိတ်ထိခိုက်ဖွယ် ဖြစ်ရပ်တစ်ခုကို ကြုံတွေ့ရနိုင်ခြေပိုများစေသည်။ အချို့သောသူများသည် အလုပ်ပြင်ပတွင် စိတ်မချမ်းမြေ့ဖွယ် ဖြစ်ရပ်များကို ကြုံတွေ့ရသော်လည်း ၎င်းတို့ နာလန်ထူစဉ် အလုပ်ခွင်ပတ်ဝန်းကျင်က ပံ့ပိုးပေးနိုင်လျှင် အကျိုးရှိနိုင်သည်။

အကယ်၍ သင့်အတွက် အလုပ်လုပ်ပေးသူတစ်ဦး သို့မဟုတ် လူအများသည် စိတ်ထိခိုက်ဖွယ် ဖြစ်ရပ်တစ်ခုကို ကြုံတွေ့ခဲ့ရပါက ၎င်းတို့ကို ကူညီပံ့ပိုးရန် သင်လုပ်ဆောင်နိုင်သည်များမှာ-

• ဖြစ်ပျက်ခဲ့သည်များကို ပြောပြခြင်း– စိတ်ထိခိုက်ဖွယ် ဖြစ်ရပ်သည် အလုပ်တွင် ဖြစ်ခဲ့ပါက ဖြစ်ရပ်အကြောင်း ပွင့်ပွင့်လင်းလင်း ပြောဆိုခြင်းက အထောက်အကူဖြစ်နိုင်သည်။ သင့်အတွက် အလုပ်လုပ်နေသူများ အခက်အခဲတွေ့နေရပါက ၎င်းတို့အကူအညီ ရယူနိုင်သည့်နေရာကို ပြောပြခြင်းကလည်း အထောက်အကူဖြစ်နိုင်သည်။
• အခြေအနေမေးခြင်း– သင်အလုပ်ခန့်ထားသောသူ တစ်ဦး သို့မဟုတ် လူအများကို ၎င်းတို့အခြေအနေမည်သို့ရှိကြောင်း မေးပါ။ ၎င်းတို့တွင် ပံ့ပိုးကူညီမှု လိုအပ်ခြင်းရှိ၊ မရှိ သိရှိရန်နှင့် ၎င်းတို့တွင် တစ်စုံတစ်ရာပြောင်းလဲမှုကို သတိပြုမိရန် ဤသည်က ကူညီပေးနိုင်သည်။ တစ်ယောက်ယောက် အခြေအနေမကောင်းဟု သင်သံသယရှိပါက 'ငါအဆင်ပြေပါတယ်' ဟူသည်ကို တုံ့ပြန်မှုအနေဖြင့် လက်ခံဖို့ သတိထားပါ။
• ပံ့ပိုးပေးသော ပတ်ဝန်းကျင်ကို ဖန်တီးခြင်း- အဖွဲ့များအတွင်း အပြုသဘောဆောင်သောဆက်ဆံရေးကို အားပေးခြင်းသည် လုပ်ငန်းခွင်တွင် အပြုသဘောဆောင်သော ပတ်ဝန်းကျင်ကို ပံ့ပိုးပေးနိုင်သည်။ ဝန်ထမ်းများအား ၎င်းတို့တက်ရောက်၊ ရရှိနိုင်သော မည်သည့်အလုပ်ရုံဆွေးနွေးပွဲ သို့မဟုတ် ပံ့ပိုးမှုစနစ်ကိုမဆို တက်ရောက်ရန် သို့မဟုတ် အသုံးပြုရန်လည်း အားပေးနိုင်ပါသည်။
• သင့်တော်သော ပြုပြင်ပြောင်းလဲမှုများ ပြုလုပ်ခြင်း- အလုပ်တွင် မည်သည့်သင့်တော်သော ပြုပြင်ပြောင်းလဲမှုများသည် ၎င်းတို့ကို ပိုမိုသက်သောင့်သက်သာဖြစ်စေနိုင်ကြောင်း သိရှိရန် သင့်ဝန်ထမ်းတစ်ဦး သို့မဟုတ် ဝန်ထမ်းများနှင့် စကားပြောပါ။ ၎င်းတွင် အလုပ်ချိန်ကို အဆင်ပြေသလို ပြောင်းလဲသတ်မှတ်ပေးခြင်း သို့မဟုတ် လုပ်ငန်းခွင်ပတ်ဝန်းကျင်တွင် သေးငယ်သောပြောင်းလဲမှုများ ပြုလုပ်ခြင်းကဲ့သို့သော အရာများ ပါဝင်နိုင်သည်။ အထောက်အကူဖြစ်မည့်အရာကို သင်သိသည်ဟု ယူဆမည့်အစား တစ်စုံတစ်ဦး လိုအပ်သည်များကို အမြဲမေးပါ။

ဤလုပ်ဆောင်ချက်များအားလုံးသည် ဝန်ထမ်းများ၏ ချမ်းသာသုခအပေါ် အပြုသဘောဆောင်သော သက်ရောက်မှုရှိနိုင်သည်။

နောက်ထပ်အကူအညီများ

အသုံးဝင်သော ဝဘ်ဆိုက်လင့်ခ်များ

• UK Psychological Trauma Society- ဤနေရာတွင် စိတ်ဒဏ်ရာအလွန် ​တွေ့ကြုံ ခံစားရ​သော စိတ်ဖိစီးမှု​တုံ့ပြန်ခြင်းများနှင့်စပ်လျဉ်း၍ အများသူငှာနှင့် ကျန်းမာရေးဆိုင်ရာ ကျွမ်းကျင်သူများအတွက် အထောက်အကူဖြစ်စေမည့် အချက်အလက်များကို တွေ့ရှိနိုင်ပါသည်။
• Coping with stress following a major incident leaflet (PDF)၊ NHS
• Overview of PTSD, NHS- NHS မှ ထုတ်ပြန်ထားသော ဤအချက်အလက်တွင် PTSD အကြောင်းပါဝင်သည်
• Overview of complex PTSD, NHS- NHS မှထုတ်ပြန်ထားသော ဤအချက်အလက်တွင် ရှုပ်ထွေးသော PTSD အကြောင်းပါဝင်သည်။
• PTSD, Mind- ပရဟိတအဖွဲ့ဖြစ်သော Mind ထံတွင် PTSD နှင့် ရှုပ်ထွေးသော PTSD ဆိုင်ရာ အချက်အလက်များ ရှိသည်။
• How can friends and family help? Mind- ဤအချက်အလက်သည် သင်သိသော PTSD ရှိနေသူကို သင်မည်သို့ကူညီနိုင်ကြောင်း အကြံဉာဏ်ပေးပါသည်
• Useful contacts, Mind- ဤစာမျက်နှာတွင် PTSD ရှိသူများအား အကူအညီပေးသည့် အခြားသော ပရဟိတအဖွဲ့များနှင့် အဖွဲ့အစည်းများသို့ လင့်ခ်များ ပါရှိသည်
• PTSD UK- PTSD အကြောင်း သိမြင်နားလည်မှု မြှင့်တင်ရန် ရည်ရွယ်ထားသော ယူကေပရဟိတအဖွဲ့

စိတ်ထိခိုက်ဖွယ် ဖြစ်ရပ်တစ်ခု ကြုံတွေ့ခဲ့သူများကို ကူညီနေသည့် ပရဟိတအဖွဲ့များ

• Cruse Bereavement Care- အင်္ဂလန်၊ ဝေးလ်နှင့် မြောက်အိုင်ယာလန်ရှိ ကျန်ရစ်သူများအတွက် ထောက်ပံ့ကူညီမှုပေးသည့် ပရဟိတအဖွဲ့
• Cruse Bereavement Care Scotland- စကော့တလန်ရှိ ကျန်ရစ်သူများ၏ သုခချမ်းသာကို မြှင့်တင်ပေးသည့် ပရဟိတအဖွဲ့

Rape Crisis – ယူကေနိုင်ငံတစ်ဝှမ်းရှိ လူအများကို ပံ့ပိုးပေးနေသည့် မုဒိမ်းကျင့်မှုအကျပ်အတည်း ကူညီရေး ပရဟိတအဖွဲ့ သုံးဖွဲ့ ရှိသည်-

• Rape Crisis - England and Wales
• Rape Crisis - Scotland
• Rape Crisis - Northern Ireland

Victim Support - ရာဇ၀တ်မှုနှင့် စိတ်ထိခိုက်ဖွယ် ဖြစ်ရပ်များတွင် သားကောင်ဖြစ်ခဲ့ရသော ယူကေတစ်ဝှမ်းရှိ လူအများကို ပံ့ပိုးပေးသည့် နစ်နာသူ ထောက်ပံ့‌ရေး ပရဟိတအဖွဲ့အစည်း သုံးခုရှိသည်-

• Victim Support - England and Wales
• Victim Support - Scotland
• Victim Support - Northern Ireland

အသိအမှတ်ပြုကျေးဇူးတင်လွှာ

ဤအချက်အလက်များကို တော်ဝင် စိတ်ရောဂါအထူးကုကောလိပ် (Royal College of Psychiatrists) ၏ Public Engagement Editorial Board (PEEB) မှ ထုတ်ပြန်ထားပါသည်။ ၎င်းသည် ဤစာကို ရေးနေချိန်တွင် ရရှိနိုင်သော အကောင်းဆုံး အထောက်အထားများကို ထင်ဟပ်စေသည်။

ဤအရင်းအမြစ်အပေါ် မေတ္တာဖြင့် တုံ့ပြန်ဝေဖန်ချက် ပေးအပ်ခဲ့သောPTSD UKအား အထူးကျေးဇူးတင်ရှိပါသည်။

ကျွမ်းကျင်သူ တည်းဖြတ်သူ- ပါမောက္ခ Neil Greenberg

ဤအရင်းအမြစ်အတွက် ကိုးကားချက်အပြည့်အစုံကို တောင်းဆိုပါက ရနိုင်ပါသည်။

ထုတ်ဝေချိန်- 2021 ခုနှစ် နိုဝင်ဘာလ

ပြန်လည်သုံးသပ်ရမည့်အချိန်- 2024 ခုနှစ် နိုဝင်ဘာလ

© Royal College of Psychiatrists