Dros yr ychydig flynyddoedd diwethaf mae AaGIC wedi sefydlu nifer o fentrau i hyrwyddo Cymru fel dewis gwych i'w hyfforddi a'u gweithio, gan gynnwys cyflwyno pecynnau cymell sy'n cynnwys cyllid ar gyfer un o arholiadau'r Coleg Brenhinol, cynyddu cyfleoedd a phroffil arbenigeddau anodd eu llenwi drwy brofiadau blasu lefel Sylfaen a hyrwyddo arbenigeddau'n rheolaidd mewn digwyddiadau Gyrfaoedd ar gyfer Hyfforddeion Sefydledig a myfyrwyr Meddygol.
Adlewyrchir llwyddiant y mentrau hyn yn y gyfradd lenwi o 100 y cant o swyddi hyfforddiant seiciatrig yng Nghymru am yr ail flwyddyn yn olynol, gyda nifer y lleoedd hyfforddi arbenigol a gynigir yn cynyddu o 21 yn 2019 i 27 yn 2020.
Mae hyn yn cymharu â chyfradd lenwi o 33 y cant yn unig yn 2017, pan mai dim ond un o bob tair swydd a lenwyd gyda 18 o leoedd ar gael a chwech yn derbyn.
Yn 2018, roedd 22 o leoedd ar gael gyda dim ond 13 o feddygon iau yn derbyn – cyfradd lenwi o 59 y cant.
Mae'r ffigurau'n dangos gwelliant sylweddol dros y 4 blynedd diwethaf, gan amlygu'r diddordeb cynyddol mewn hyfforddiant seiciatrig yng Nghymru.
Dywedodd Dr Maria Atkins, cadeirydd Coleg Brenhinol y Seiciatryddion yng Nghymru:
"Mae bod yn seiciatrydd yn yrfa werthfawr iawn ac mae hyn yn newyddion cyffrous i gleifion yn ogystal â'r arbenigedd.
"Mae seiciatreg yn ddewis gyrfa gwych, sy'n delio â bywyd go iawn. Yng Nghymru rydym yn arwain y byd mewn sawl agwedd ar iechyd meddwl, felly mae ein hyfforddeion yn cael cyfle i ddod yn rhan o rywfaint o ymchwil arloesol.
"Mae cynlluniau fel ymgyrch Dewis Seiciatreg y Coleg ledled y DU wedi helpu'n aruthrol yn ogystal â rhaglen #HyfforddiGweithioByw Llywodraeth Cymru.
"Ond rhaid i ni beidio â bod yn hunanfodlon. Bydd angen seiciatryddion ar bobl bob amser, mae'n yrfa ddiddorol iawn ac mae angen i ni wneud popeth o'n gallu i barhau i'w hyrwyddo fel dewis gyrfa ardderchog i bob meddyg iau."
Dywedodd Vaughan Gething, y Gweinidog dros Iechyd a Gwasanaethau Cymdeithasol:
"Mae Llywodraeth Cymru wedi ymrwymo i ddarparu'r gweithlu sydd ei angen i ddarparu system iechyd a gwasanaethau cymdeithasol fodern, gynaliadwy fel y'i nodir yn Cymru Iachach. Rydym yn parhau i gefnogi'r gwaith o ehangu lleoedd hyfforddi meddygon teulu yng Nghymru a thrwy ein hymgyrchoedd marchnata rydym bellach wedi ennill enw da fel lle rhagorol i weithwyr meddygol proffesiynol Hyfforddi, Gweithio a Byw."
Ar ôl ysgol feddygol, mae hyfforddeion yn dilyn rhaglen hyfforddiant sylfaen dwy flynedd i bontio'r bwlch rhwng yr ysgol feddygol a hyfforddiant arbenigol pellach. Ar ôl Ysgol Sylfaen, mae meddygon iau yn dewis dilyn naill ai meddygaeth Gyffredinol neu Arbenigol.
Y rhaglen hyfforddi seiciatreg arbenigol chwe blynedd yw'r cam olaf yn y daith i fod yn seiciatrydd ymgynghorol – y meddyg uchaf sy'n arbenigo ym maes iechyd meddwl.
For further information, please contact:
- Email: oliver.john@rcpsych.ac.uk
- Web: https://www.rcpsych.ac.uk/wales
- Contact Name: Ollie John
- Twitter: @RCPsychWales
- Out-of-hours contact number: 02922 33 1080